Liquisa, Loron-19, fulan-Janeiru, tinan-2023, Ministériu Públiku (MP) realiza retiru anuál ba tinan-2022 nian ho tema prinsipál “Avaliasaun Atividade Ministériu Públiku tinan-2022 no Planifikasaun Atividade tinan-2023” retiru ne’e realiza iha Sentru Formasaun Tibar, Munisípiu Liquisa.
Iha retiru refere Prokuradór-Jerál Repúblika (PJR), Dr. Alfonso Lopez, mak hala’o abertura nune’e biban ne’e, Padre, Graciano Soares (SVD), halo reflesaun ba Majistradu, ofisiál Justisa, funsionáriu no partisipante sira hotu ho tema reflesaun “Importansia etika iha Kontestu atuál iha sosiedade”.
Iha sesaun abertura, Prokuradór-Jerál Repúblika Dr. Alfonso Lopez, hateten, Ita hotu halibur-malu iha ne’e ho objetivu, atu halo avalia ba atividade ne’ebé ita realiza ona durante tinan-2022; atu rekolla subsídiu sira ne’ebé útil hodi tau iha planu atividade sira tinan-2023 nian no ita reforsa no hametin relasaun institusionál no konvivénsia interpesoál”.
Nune’e mós PJR fo apresiasaun ba servisu sira hotu durante ne’e hala’o liuhusi Prokuradoria Repúblika no Servisu espesializadu sira ba rezultadu ne’ebé hetan iha tinan-2022, insentiva no dezafia ba Prokuradór Repúblika, ofisiál justisa no rekursu umanu sira seluk atu kontinua ho modelu ida ne’e iha tinan-2023, tanba ho servisu barak iha sentidu responsabilidade no rezultadu ne’ebé di’ak.
PJR haktuir tan katak Implementasaun ba Estatutu foun Ministériu Públiku nian ne’ebé prevee ona órgaun no servisu foun sira, sei kria mekanizmu foun hodi asesu ba servisu sira no karreira, aumenta atribuisaun Ministériu Públiku nian espesialmente, atribui ba nia kompeténsia atu defende interese koletivu no difuzu sira, ba idozu no adultu sira ne’ebé ladun iha kapasidade ema vulnerável sira no halakon dezafiu sira ne’ebé presiza kontribuisaun hotu-hotu nu’udar válidu no útil.
Hafoin loron dahuluk termina tiha aprezentasaun servisu sira hosi Prokuradoria Repúblika Primeira Instânsia sira hanesan; Rejiaun Administrasaun Espesiál Oe-Cusse, aprezenta hosi Dr, Mateus Nesis, Prokuradoria Repúblika Primeira Instânsia Munisípiu Covalima, aprezenta hosi , Dr. Pascasio de Rosa Alves, Prokuradoria Repúblika Primeira Instânsia Munisípiu Baucau, aprezenta hosi, Dr. Nelson Carvalho, Prokuradoria Repúblika Primeira Instânsia Munisípiu Dili, aprezenta hosi, Dr. Jacinto Babo Soares. nune’e iha loron daruak nian, hahu kedan hosi Gabinete Sentrál Kombate Korrupsaun no Kriminalidade Organizada no aprezenta hosi Adjunta PJR, Dra. Remízia de Fátima da Silva, hosi Gabinete Kontensiozu Estadu, Dr. Alfeu da C. Moreira mak aprezenta, Gabinete Inspesaun aprezenta hosi Dra. Zélia Trindade, nune’e mós aprezentasaun ikus hosi Servisu Administrasaun Jerál, aprezenta hosi Gil da Conceição Savio, ikus liu Prokuradór Jerál Repúblika, Dr. Alfonso Lopez mak ensera retiru anuál refere. (Media PJR)