DILI — Segunda, loron-9, fulan-Setembru, tinan-2019, Prokuradór-Jerál Repúblika Dr. José da Costa Ximenes akompaña hosi Adjuntu-PJR ho ekipa tékniku sira halo diskusaun ho Komite Revizaun Orsamentu Polítika tinan-2020, iha Auditóriu Xanana Gusmão, Ministériu Finansas.    

Komite Revizaun Orsamentu Polítika (KROP) tinan-2020 ne’ebé lidera hosi Primeiru Ministru Taur Matan Ruak hahú halo apresiasaun no filtarizasaun ba proposta orsamentu 2020 ho liña servisu sem Fundu Autónoma, Servisu Fundu Automas, Instituisaun Estadu no Munisípiu.

Diskusaun dahuluk nian hahú hosi Ministériu Públiku ne’ebé aprezenta kona-ba metas sira ne’ebé sai prioridade ba Ministériu Públiku nian liuliu ba konstrusaun edifísiu iha Munisípiu Lautém no Edifísiu Servisu Espesializadu. 

Vice Ministra finansas ka atuál Ministra finansas interina Sara Lobo Brites husu atu PJR aprezenta OJE tuir proposta ne’ebé iha, ikusliu mak hato’o rekomendasaun, konkluzaun bazeia ba justifikasaun ne’ebé iha.

Iha diskusaun ne’e, Prokuradór-Jerál Repúblika Dr. José da Costa Ximenes hato’o katak iha tinan-2019 grand totál ba ezekusaun orsamentu Prokuradoria Jerál Repúblika nian hamutuk 67%, hosi hirak-ne’e Saláriu no Vensimentu konsege atinji 61%, over time nian 5% hosi orsamentu $1.620,127 ne’ebé atribui ba ami ba tinan-2019 nian, ezekuta tiha ona $910.051,56 no osan restu ne’ebé agora ne’e iha hamutuk $710.07544.

Iha posibilidade boot iha over time ninian ne’e, normalmente sei selu iha tinan ikusliu tanba sei akomula turnu sira ne’ebé iha. Ezekusaun rubrika Bens no Servisu atinji 89%, hosi hirak ne’e ezekuta tiha ona $760.457,10 atuál, Obligasaun $266.961,49, Komitmentu $151.718,75 no sei iha saldo $152.895,66, serake MP bele garanti hodi sustenta atividade operasionál Prokuradoria Jerál Repúblika nian to’o (fim-de-ano) tinan ikus no halo de’it jestaun.

Tuir mai PJR mós esplika kona-ba rubrika Kapitál  Menór nian $337.000 alokadu no ezekuta ona $89.280, Obligasaun $47.170 no Komitmentu $198.625, nune’e to’o tinan ikus bele ezekuta hotu.

Ikus nian, rubrika Kapitál  Dezenvolvimentu tinan uluk atribui $248.930 ba Ministériu Públiku hodi prepara ba projetu boot rua hanesan edifísiu Servisu Espesializadu no edifísiu Prokuradoria Distritu iha Munisípiu Lospalos, iha kompañia rua mak pasa selesaun dokumentu, espera katak sei laiha impedimentu ruma, nune’e, MP bele selebra kontratu iha loron-1, fulan-Outubru.

Nune’e, MP mós husu adisionál ba rubrika Bens no Servisu, Kapitál Menór no Reapropriasaun Kapitál Dezenvolvimentu hodi halo manutensaun ba edifísiu Prokuradoria Jerál Repúblika, Prokuradoria Distritál sira, no rezidénsia hirak ne’ebé konstrui iha tinan- 2012, tanba ne’e MP husu Governu aumenta tan orsamentu oituan hodi halo manutensaun ne’e. Aléinde ne’e, kona-ba rubrika Saláriu no Vensimentu, Ministériu Públiku husu atu halo transferénsia orsamentu balun ba rubrika Bens no Servisu tanba kontajen manuál kada tinan Saláriu Ministériu Públiku nian sei sa’e 5%. (Media/PJR)