Dili ─ iha Sesta,
loron-1, fulan-Marsu, tinan-2019, Prokuradór-Jerál Repúblika Dr. José da Costa
Ximenes loke diskusaun hodi debate Projetu Proposta Lei Estatutu Ministériu
Públiku nian, nune’e iha tempu badak bele submete ba iha Konsellu Ministru hodi
haree no deskute kle’an liután.

Diskusaun ne’e involve hosi matenek-na’in
sira no entidade sira área jurídika nian  hanesan; Tribunál Rekursu, Ministériu Justisa,
Defensór Públiku Jerál, Assosiasaun Advogadu Silva Texeira, TDD, ALFELA, CAC, JSMP,
AJAR, no    Departamentu Diretu – UNTL.       

Objetivu hosi diskusaun ne’e rasik hodi bele
hadi’a di’ak liután estatutu ida-ne’e no oinsa bele regula, Estatutu ne’e la’os
regula de’it kona-ba papél no kompeténsia sira majistradu Ministériu Públiku nian
maibé oinsa bele sai hanesan diploma ida hodi regula mós kona-ba integrasaun Ministériu
Públiku iha Sistema justisa nia laran, no ninia finalidade maka oinsa bele hetan
solusaun hodi bele hadia di’ak liután servisu MP nian.

Diskusaun ida-ne’e hanesan faze dahuluk, MP
hahú prepara no diskute asuntu refere ne’e kuaze tinan ida liubá iha Konsellu
Superior MP, espera katak liuhosi diskusaun ida-ne’e, matenek-na’in sira hosi
área jurídika nian sei bele fó opiniaun, perguntas no sujestaun hodi hadia di’ak
liután Estatutu ida-ne’e.

Iha biban ne’e PJR hateten katak Estatutu
atuál hetan aprovasaun tuir lei no. 14/2005, maibé estatutu ida-ne’e rasik
labele ona atu responde ba ita-nia nesesidade no dezafius sira daudaun ne’e no
mós ba futuru nian, tanba ne’e mak ita tenta atu halo Projetu Proposta Lei ida-ne’e
ho objetivu hodi minimiza lakunas ne’ebé ita iha.

Estatutu foun ida-ne’e iha ninia Artigu
hamutuk 240°, no sei fahe ba parte tolu hanesan tuirmai; parte dahuluk iha
ninia títulu rua hamutuk ho ninia kapítulu rua ne’e defini kona-ba estrutura,
funsaun no rejime intervensaun, parte daruak nian iha ninia títulu úniku
hamutuk ho ninia kapítulu hitu ne’ebé defini kona-ba Majistratura MP nian,
organizasaun no estatutu no parte datoluk nian defini kona-ba dispozisaun
komplementár, tranzitóriu no finál sira.   

Konkluzaun
hosi diskusaun ida-ne’e katak estatutu ne’ebé mak sei debate hela ne’e bele
hetan ninia rezultadu pozitivu nune’e sei bele tulun hodi rezolve problema ka
dezafiu sira ne’ebé MP infrenta daudaun ne’e no mós iha futuru.   

Iha
fatin hanesan Komisáriu KAK Dr. Sérgio da Costa Hornai apresia tebtebes           Prokuradór-Jerál Repúblika tanba iha
ona hanoin inovativu hodi halo diskusaun aberta ida-ne’e hodi bele renova
estatutu refere.    

Diskusaun
ida-ne’e hetan partisipasaun másimu hosi partisipante sira hodi ko’alia    kona-ba artigu balun no ida-ne’e sai
hanesan buat ida bé interesante tebes ba matenek-nain sira no entidade sira ba
Ministériu Públiku nian. (Media/PJR)