Tibar ─ iha Tersa, loron-3, fulan-Juñu, tinan-2019, bazeia ba despaxu hosi Prokuradór titulár nian iha folla 300, ho nune’e, koordena tiha ho parte Autoridade Aduaneiru nian hodi hala’o destroisaun ba objetu ho tipu uniforme militár ho totál hamutuk kaixa sanulu (10) iha área Tibar nian.    

iha tinan-2014, iha portu Díli, Autoridade Aduaneiru konsege apreende tiha objetu refere ne’e, no apreensaun ne’ebé ezekuta iha momentu ne’ebá haktuir ho Lei Kódigu Aduaneiru, Dekretu Lei no. 11/2008, tanba objetu hirak-ne’e la deklara iha dokumentu laran, haree ba prosedimentu ida-ne’e, entaun sira viola ona Kódigu Aduaneiru nian, nune’e Autoridade Aduaneiru sira foti medida hodi halo apreensaun ne’e no tuirmai sira informa ba parte seguransa  iha Gabinete Primeiru Ministru nian, hafoin tiha ne’e submete ba Ministériu Públiku hodi hala’o prosesu legál.

Durante ne’e parte Autoridade Aduaneiru sira mak asegura hela objetu ho tipu uniforme militár ne’e, no iha fulan kotuk liubá, Autoridade Aduaneiru hetan notifikasaun hosi Ministériu Públiku, hodi halo destroisaun ba objetu ne’e.

Objetu hirak-ne’ebé mak atu destroi  hanesan kolete militár, moxila kór malahuk, jaket metan, kamiza liman naruk ho kór metan, boña kór mean, aljemas, koldre arma nian no seluk tan, maibé kamiza liman naruk metan ida mak laiha, ho razaun tanba momentu ne’ebá Autoridade Aduaneiru sira muda hosi edifisiu tuan ba fali edifisiu foun, ida-ne’e mak parte Autoridade Aduaneiru sira hakarak esklarese.  Iha loron hala’o destroisaun ba objetu hirak-ne’e, reprezentante hosi Ministériu Públiku hamutuk ho Autoridade Aduaneiru Munisípiu Díli, Julião José Ximenes Diretór Operasaun no mós Postu Polisía Tibar Primeiru Sarjentu Eugebio dos Santos. (Media/MP)