Dili- loron-18, fulan-dezembru, tinan-2002, Ministériu Públiuku (MP) ho Polísia Nasionál Servisu Investigasaun Kriminál (PNSIK) halo insinerasaun ba matéria báziku droga Carisprodol ho kuantidade saku ualu no todan kilograma 206.95 iha Hospitál Nasionál Guido Valadares (HNGV) no númeru ba prosesu ne’e mak 0075/19 PNSIK.
Molok halo insinerasaun, Koordenadora Gabinete Sentrál Kombate Korrupsaun no Kriminalidade Organizada (GSKKKO), Dra. Lidia Soares hatete katak “Iha momentu ida-ne’e, ita sei sunu ka destrui matéria báziku droga Carisprodol etapa daruak, etapa dahuluk kaixa haat, etapa daruak mós sunu kaixa haat”.
Koordenadora ne’e akresenta tan katak “molok hala’o insinerasaun halo uluk liña koordenasaun ho saúde públiku, HNGV no ambientál nian ne’ebé fó tebes ajuda ba autoridade sira hodi la presiza halo tan insinerasaun to Maubara, maske entermus organizasaun ita haree no rona reklamasaun ruma hosi komunidade liga ho saúde públiku no ambientál, tanba ne’e molok halo insinerasaun ami ko’alia ona ho sira ne’ebé mak iha ligasaun ho situasaun refere, nune’e iha desizaun katak la fó impaktu ba sasán hirk ne’e, nune’e mós fatin ne’ebé fó suar sai nian mós aumeta tan ba metro 9, tan ne’e nia suar sei sa’e ba leten, nune’e mós tuir paresér hosi Forensik katak la kontein kimiku iha laran, ne’e duni la fó impaktu ba saúde bainhira ita sunu uza ho mákina”.
Iha fatin hanesan, Prokuradór titulár ba prosesu, Dr. Matias Soares, esplika katak “kona-ba apreensaun, prosesu ne’e halo desde tinan-2019, ikusmai tribunál deside afavor ba Estadu, ho nune’e mak halo insinerasaun tanba matéria báziku ne’e tau hamutuk bele sai droga nune’e mós liuhosi prosesu investigasaun polísia nian, hafoin lori bá iha tribunál ikusmai tribunál desidi atu halo insinerasaun ba matéria baziku droga ne’ebé hanaran carisprodol”.
Iha insinerasaun ba loron daruak ne’e, hetan partisipasaun hosi Adjunta Prokuradór Jerál Repúblilka (APJR). Dra. Remizia de Fatima nune’e serimónia enserramentu ba insinerasaun matéria droga refere Adjunta mak halo. Liuhusi serimónia enserramentu ne’e APJR dehan; “ohin ita enserra serémonia sunu matéria baziku droga ne’ebé realiza ona horsehik, tanba kondisaun fatin mak la konsegue realiza hotu, ha’u agradese ba ekipa ne’ebé hola parte hamutuk iha prosesu ida-ne’e, agradese ba HNGV, Adjuntu PNSIK, Saúde Públiku, Diresaun Ambientál, Xefe Lojistika HNGV, Prokuradór Titulár no Koordenadora GSKKKO, desizaun tribnunál desidi ona maka prosesu hotu ona, iha faze ezekusaun desizaun tribunál nian desidi ona katak, prosesu Nuc 0075/95/PNSIK arkivadu tanba ne’e objetu sira ne’ebé kompostu husi saka 8 tenke halo insinerasaun”.
Hafoin sunu-motuk matéria baziku Droga Carisprodol iha HNGV, ekipa sira lori kedas nia uut ba hakoi iha Tibar no sira ne’ebé partisia iha prosesu insinerasaun ne’e mak; Saúde Públiku, Komandante PNSIK, Diretór Nasionál HNGV, Diretór Lojistika HNGV, meiu ambiente, Prokuradór titulár ba Prosesu, Koordenadora GSKKKO no Ofisiál Justisa sira husi Ministériu Públiku, (Media PJR).