Dili, loron-18, fulan-Outubru, tinan-2023, Ministériu Públiku (MP), United Nations International Children’s Emergency Fund (UNICEF), ho susesu organiza konferénsia Internasionál ho tema Promover o Bem-Estar e um Ótimo Desenvolvimento das Crianças de Timor-Leste. Iha konferénsia ne’e MP konvida oradór prinsipal husi Australia Dra. Helen Jaqueline McLaren, husi Portugal, Dra. Maria Joana Marques Vidal, Vise Ministra Ministériu Solidariedade Sosiál no Inkluzaun (MSSI), Dra. Céu Brites, no painél Virtual na’in rua husi Cambodia Dr. Phi No, no husi Singapura Dra. Rachel Harvey.
Konferénsia ne’e, Prokuradór Jerál Repúblika, Dr. Alfonso Lopez, mak abertura, nune’e iha nia diskursu abertura nian hatete katak, “koalia kona-bá violénsia familiár, tanba ita hatene katak iha ne’ebé mak iha agresaun fízika, psikolójika, alkolízmu no droga, sei fásil liu atu akontese abuzu ka fuga ba labarik no joven sira nune’e mós família mak fatin ne’ebé seguru ba labarik sira, fatin ne’ebé sira sente katak hetan domin, apoiu no iha oportunidade atu sira bele dezenvolve”.
Entretantu iha seremónia abertura ne’e mós PJR hato’o agradese ba parte hotu “agradese ho forma spesiál ba partisipante sira, liu-liu sira ne’ebé ho laran luak desloka mai Timor-Leste atu fahe sira nia matenek, esperiénsia no ensimanetu sira mai ita no sei kontribui atu hariku konferénsia ida ne’e, nune’e mós agradese espesiál ba Unicef nia apoiu ne’ebé fundamentál ba realizasaun konferénsia ida ne’e, laiha kolaborasaun ida ne’e konferénsia sei lahala’o tuir moldura ne’ebé agora hala’o dadaun ne’e”.
Nune’e mós representante United Nations International Children’s Emergency Fund (UNICEF), Sr. Bilal Aurang Zeb Durrani, hateten, “ami iha parseria ho MSSI, hodi kontinua harii kapasidade servisu sosiál sira-nian hodi kumpre mandatu atu promove, prevene no responde ba kestaun sira ne’ebé afeta ba labarik sira, nune’e mós UNICEF nafatin suporta MP iha programa sensibilizasaun ba eskola sira kona-ba direitu labarik.
Iha okaziaun ne’e mos, Vise Ministra MSSI Dra. Céu Brites, iha nia diskursu enseramentu nian katak, “Governu Timor-Leste halo ona progresu signifikante iha dezenvolvimentu sistema bem-estar sosiál ida ne’ebé mak komprensivu no funsiona hodi fó protesaun ba labarik sira, nune’e lei ba protesaun labarik no joven iha perigu, ne’ebé sei halo re’evaluasaun ba situasaun labarik iha Centro Acolhimento Institusionál (CAI), katak fulan neen (6) hafoin tama iha vigór prosesu no situasaun hot-hotu ba labarik no joven sira iha CAI, sei avalia fila fali husi servisu protesaun ba labarik no joven sira no husi MP atu identifika alternativa posivél ba kuidadu no hahú prosesu protesaun ne’ebé deskreve iha Lei.
Iha konferénsia ne’e, Inspetora MP, Dra. Zelia Trindade, Prokuradór Republika Dr. Matias Soares, no Koordenadora Prokuradoria Primeira Instánsia Baucau, Dra. Remizia de Fátima da Silva mak modera konferénsia refere.
Konferénsia ne’ebé realiza iha Timor Plaza,Suai Room ne’e, hetan partisipasaun husi Provedoria dos Direitus Umanu e Justisa, Membru Parlamentu Komisaun A, Membru Parlamentu Komisaun F, Setór Justisa balun, Majistradu MP, Adjuntu Prokuradór Jerál Repúblika, Membru Polísia,Sosiedade Sívil, reprezentate relijiosu sira no estudante balun, (Média MP).