DILI – Prokuradór-Jerál Repúblika (PJR), José da Costa Ximenes, iha segunda (09/01/2017) liu hosi enkontru regulár ho Prezidente Repúblika, Taur Matan Ruak, informa kona-ba atividade sira ne’ebé no prioridade servisu Ministériu Públiku (MP) nian ba tinan-2017 ne’e.
“Ohin hasoru malu ho Prezidente Repúblika hanesan informasaun mensál hosi Prokuradór Jerál Repúblika, fó hatene Xefe Estadu kona-ba atividade sira ne’ebé Ministériu Públiku hala’o, no mós kona-ba preparasaun ba Retiru Anuál MP ninian, ne’ebé mak sei realiza hosi loron-19 to’o loron-22 hodi halo avaliasaun progresu no dezafiu iha MP nian iha tinan-2016 nia laran. Aumezmu tempu, ami trasa prioridade balun ba tinan-2017, no planu prinsipál tolu mak hanesan, primeiru, konsolida no promove justisa ida ne’ebé efetivu no lalais, maske ida ne’e la depende ba MP mesak tanba depois ami halo tiha ami nia servisu ami sei promove ba Tribunál, portantu interdependénsia MP ho Tribunál. Planu ba daruak mak ita hakarak halo sosializasaun ida hanesan prevensaun ka konsensializasaun jurídika (kesadaran hukum) ba komunidade sira liu-liu iha fatin sira ne’ebé mak krime ne’e makas no ami sei servisu hamutuk ho Polísia Nasionál Timor-Leste (PNTL) no Ministériu Justisa (MJ) hodi halo prevensaun ida ne’e. Ba kestaun dala tolu nian, ami sei servisu hamutuk ho UNDP atu estabelese klínika asesu ba justisa no sei hahú iha Baucau no Suai, ho objetivu prinsipál atu ajuda komunidade sira, fasilita sira nia asesu ba justisa”, informa PJR ba jornalista sira hafoin remata enkontru ho Prezidente Repúblika iha Palásiu Prezidensiál Prezidente Nicolau Lobato.
PJR mós hatutan katak hosi tinan-2013 to’o mai iha tinan-2016, númeru prosesu tama foun ne’e kontinua aumenta tinan-tinan.
“Haree ba prosesu entrada ka prosesu tama ne’e, iha tinan-2013 iha 3,600, iha tinan-2014 tama 3,800, iha 2015 tama 4,200, no iha tinan-2016 iha prosesu tama hamutuk 4,300. Hamutuk ho prosesu sira uluk ne’e, MP konsege finaliza liu 5,000 prosesu iha tinan-2016, balun arkivamentu no balun akuzasaun”, informa PJR.
Hatan ba perguntas jornalista sira-nian kona-ba kazu Emília Pires nian, PJR deklara katak nia lakohi komentáriu tanba sei hein desizaun hosi Tribunál Rekursu, hein ida ne’e bele deside lalais la hanesan ho kazu sira seluk hanesan kazu João Câncio ne’ebé tinan rua liu ona seidauk iha desizaun. (Media PJR)