DILI ─ Sesta, loron-26, fulan-Jullu, tinan-2019, Prokuradór-Jerál Repúblika Dr. José da Costa Ximenes halo enkontru ho reprezentante UNDP iha Timor-Leste ne’ebé ko’alia kona-ba kooperasaun no apoiu saida mak UNDP bele fornese iha futuru liuliu kona-ba  kombate violénsia doméstika (VD) iha Timor-Leste. Enkontru ne’e halo iha Gabinete Prokuradór-Jerál Repúblika,  Colmera, Dili.

Iha biban ne’e, reprezentante UNDP nian hatete katak UNDP iha fundus hamutuk USD 500 miliaun no sei uza hodi apoiu ba programa no atividade sira ne’ebé mak nasaun barak halo, no UNDP rasik iha fundus USD 50 miliaun hodi fó apoiu ba programa kapasitasaun ba iha illa sira iha Ázia Pasífiku no Timor-Leste ne’ebé foka liu ba violénsia doméstika.

Iha enkontru ne’e, parte UNDP nian mós hakarak rona no hatene loloos apoiu saida mak sira bele fó ba MP iha futuru, no oinsá atu kooperasaun ne’e bele la’o di’ak liután.  

Iha sorin seluk, Prokuradór-Jerál Repúblika Dr. José da Costa Ximenes hato’o agradesimentu barak ba UNDP ne’ebé mak durante ne’e fó ona apoiu ba atividade sira ne’ebé MP halo, no mós informa ba bainaka sira ne’e katak MP kontinua foka ba iha área violénsia doméstika, ida-ne’e nu’udar mós prioridade ida bé importante tebes.

Aleinde ne’e, PJR hateten liután katak Prokuradór balun mós partisipa iha formasaun oioin iha Bangkok, Tailandia, ne’ebé organiza husi Estadus Unidus Ámerika liuhusi ninia embaixada iha Díli. “Iha tinan oin MP iha programa tolu ne’ebé importante tebes atu halo mak hanesan; violénsia doméstika, formasaun no ikusliu mak proposta projetu hakerek livru kona-ba abuzu seksual minoridade no violénsia doméstika kontekstu Timor-Leste. Iha loron 06/06/2020 MP sei selebra ninia loron aniversariu ba dala-20, no iha loron ne’e kedas sei halo lansamentu ba livru ida-ne’e”. Hateten PJR.  (Media/PJR)