Dili-loron-18, fulan-Maiu, tinan-2023, Prokuradór Jerál Repúbika (PJR), Dr. Alfonso Lopez hato’o intervensaun iha seremónia ba inaugurasaun Fatin Halimar ba Labarik sira iha edifisíu Asistensia Legál ba Feto no Labarik (ALFELA) hodi hatete katak Ministériu Públiku (MP) ho Alfela nia kooperasaun to’o agora nafatin metin.
Ohin marka istoria foun ba Alfela, liu-liu ba atendimentu labarik sira, ba dala uluk iha alfela prepara fatin ba labarik sira, nune’e PJR louva ba inisiativa, Señora Diretora, Marselina Amaral, uluk ha’u sei prokuradór sempre iha ligasaun direta, liu-liu ba atende krime violénsia bazeia ba jenéru, abuzu seksuál ba menór, violasaun seksuál, krime sira ne’e Alfera sempre fasilita, to’o agora balun arguidu no kondenadu no hetan kastigu iha Bekora, hatete PJR liu hosi nia intervensaun.
PJR afirma tan katak “balun uluk halo violasaun seksuál ba nia oan rasik nain rua, ha’u mak atende no ha’u mak investiga direta no kastigu masimu tinan-30, ne’e tanba apoiou hosi Alfela mós”.
Nia reafirma tan “ita hatene MP ne’e nia papél sita iha Konstituisaun RDTL artigu-132, katak MP defende estadu, nia lori estadu nia naran ba defesa liu-liu ezerse asaun penál defesa ba menór no labarik, MP hasoru ema aktu violentu sira, aktu ilisitu sira no aktu kriminozu sira, tantu iha penál no sivíl, nune’e mós MP sai aman Juridíku ba labarik no menór sira, tanba interese labarik nian ne’e superior ba interese ina-aman nian.
PJR realsa tan katak, MP nia presenja iha ne’e la’ós pesoál, PJR mak mai ne’e signifikante tebes, ne’e sei hametik liu tan ita nia kooperasaun servisu.
Entretantu Alfela prepara fatin halimar ba labarik sira nian ne’e ho objetivu, atu kliente feto ne’ebé mai ho nia oan kikoan sira no labarik sira ne’ebé sai vítima bele asesu fatin halimar antes ofisiál legal Alfela nian fornese asisténsia ne’ebé ho livre no adekuadu, (Media PJR).