Dili-Ohin, Segunda, loron-16, fulan-novembru, tinan-2020 Prokuradoria Distritál Dili no Komandu Polísia Munisípiu Dili, hala’o termu entrega motorizada aprensaun hamutuk tolunulu resin-ida (31) ba Diresaun Nasionál Patrimóniu Estadu (DNPE) atu hala’o leilaun públiku.
Motorizada hirak- ne’e PJR ho PNTL deside halo leilaun tanba durante aprensaun iha tinan hirak liubá to’o agora nain la mai halo reklamasaun no la kumpre devér selu multa ba estadu, no entrega mós objetu aprensaun seluk ba DNPE hanesan Bisikleta rua ai-kuadradu 5/7 hamutuk rihun ida hitu (1007), ai-kuadradu ho medida 5/10 hamutuk rihun rua sanulu resin-tolu (2013), ne’ebé parte PNTL halo aprensaun husi kompañia nasionál balun ne’ebé hatama ilegál mai Timor Leste iha tinan hirak liubá.
Objetu hirak ne’e hetan ona desizaun husi Tribunál Dili ho Numeru NUK; Exp. 1243/07/20 katak, Objetu hirak-ne’e afavór ba estadu no entrega ba MP hodi entrega fali ba Diresaun Nasionál Patrimoniu Estadu.
Iha fatin hanesan, Adjuntu Prokuradór Jerál Repúblika Dr. Alfonso Lopez, hato’o agradesimentu ba Komandu PNTL Dili ne’ebé halo identifikasaun ona ba Objetu aprendidu sira ne’e hodi aprenzenta ba Tribunál Dili hafoin foti dezisaun no fó autorizasaun hodi entrega evidensia hirak ne’e ba Diresaun Nasional Patrimoniu Estadu.
APJR haree katak, bainhira sasan ka objetu sira ne’ebé PNTL halo aprensaun ne’ebé tama kategoria ba krime tenki resolve tuir lei tanba ne’e, bainhira sasan sira ne’e resolve tiha iha tribuál, Estadu mak sai na’in hodi halo leilaun atu rekopera prejuizu ba osan estadu nian.-
Nune’e mós Komandante PNTL Munisipiu Dili Superintendente xefe, Henrique da Costa reforsa tan katak, sira-nia parte agradese ba servisu konjuntu ne’ebé halo hodi entrega objetu aprensaun hirak ne’e ba estadu. Bainhira sasán sira-ne’e entrega ona bele hamamuk pátiu komandu PNTL nian no livre uitoan, ne’ebé fatin ne’e agora livre ona ba membru PNTL sira atu hala’o servisu ho espasu di’ak tanba dalaruma motór hirak ne’e rai hamutuk halo membru sira servisu ladun seguru bele afeta ba sira nia saúde. Ba oin PNTL sei halo identifikasaun hodi entrega tan objetu sira seluk.
Superintendente xefe, Henrique rekoñese objetu hirak-ne’e balun rai to’o tinan sanulu resin ona, halo motor barak halo ninia komdisaun fiziku sai fali hanesan sokata, tanba PNTL Dili seidauk iha fatin seguru ba konservasaun sasán aprendidu sira.
Evidenisa hirak ne’e entrega liuhusi termu entrega hosi Prokuradór Jerál Repúblika ba DNPE, hodi kontinua halo ispensaun direta ba evidensia hirak ne’ebé prende hela durante tinan barak iha kontentór lima ne’ebé rai iha aredór Komandu PNTL Dili nian. (Media MP)