Dili-Kinta, loron-01, fulan-Jullu, tinan-2021, Ministériu Públiku (MP) hala’o eleisaun hodi hili Prokuradór Repúblika na’in-rua hodi reprezenta MP iha Komisaun Nasionál Eleisaun (CNE), haktuir avizu no. 2/2021 husi Parlamentu Nasionál iha loron-23, fulan-Juñu no Despaxu no. 96/PGR/2021 hosi Prokuradór-Jerál Repúblika loron-28, fulan-Juñu.
Iha eleisaun ne’e hetan partisipasaun másimu husi majistradu MP sira no konsege hili kandidatu na’in-rua hanesan Dr. Domingos Barreto nu’udar membru efetivu no Dr. Napolião Soares da Silva nu’udar membru suplente ne’ebé mak sei reprezenta MP hodi haree ba asaun penál durante eleisaun Prezidente Repúblika no Eleisaun Parlamentár. Bazeia ba apuramentu finál rezultadu eleisaun hosi meza asembleia votu no boletin sira votu nian inklui dokumentu sira kona-ba eleisaun nian ho rezultadu apuradu hosi meza mak hanesan; vota afavór 32 no branku 5, ho nune’e, maioria fó votus afavór.
Iha biban ne’e, PJR Dr. Alfonso Lopez hato’o parabens ba Prokuradór na’in-rua ne’ebé mak foin asume kargu foun ne’e atubele servisu ho objetividade no legalidade, maski mosu difikuldade barak iha oin mai, maibé, fiar katak servisu sei la’o ho di’ak.
Iha sorin seluk, kandidatu Dr. Domingos Barreto hato’o ninia agradesimentu ba konfiansa ne’ebé majistradu MP sira fó ba nia hodi re-eleitu ba haknaar iha CNE durante periodu tinan-5 nia laran.
Hafoin eleisaun remata, iha salaun enkontru PJR Colmera, Dr. Domingos haklaken lian hodi hateten “ha’u agradese ba PJR ne’ebé mak fó ona konfiansa mai ha’u, no konfiansa ida-ne’e ha’u sei kaer nafatin hodi reprezenta MP hodi garante asaun penál, servisu ho imparsiál no sei la apoiu ba Partidu A ka B”.
Nia mós haklaken liután katak servisu ne’e sei hala’o tuir liña koordenasaun entre liña ministeriál sira hanesan; CNE, Sekretariadu Tékniku Administrasaun Eleitórál (STAE), Ministériu Administrasaun Estatál no Ministeriu Negósiu Estranjeiru, nune’e, bele haree kona-ba asuntu sira eleisaun nian iha rai-laran no rai-li’ur hodi nune’e Timoroan sira bele ezerse sira-nia direitu no partisipa iha festa demokrásia ida-ne’e ho di’ak, (Media MP).