Dili-Kinta, loron-19, fulan-Novembru, tinan-2020, Ministériu Públiku, PNTL no PSIK hala’o Destruisaun Drogra Metanfetanima ho tipu sabu-sabu ho kilograma 3,253, ho numeru prosesu Nuk:0010/20.PNSIC, ezekuta tuir depaixu PJR nian iha loron-01, fulan-Outubru, tinan-2020, iha HNGV.

Droga ne’e hetan prende iha Aeroportu Internasionál Prezidente Nicolau dos Reis Lobato Comoro Dili hosi Autoridade Seguransa kompostu hosi Polísia Servisu Investigasaun Kriminál (PSIK), Servisu Informsaun Polísia (SIP) no Alfandega Timor-Leste.  Kondenadu ba kazu droga ne’ebé kumpre ona pena prizaun efetivu iha Prizaun Becora.

Droga ne’e mai husi nasaun Nijeria to’o Timor Leste iha loron-06, fulan-janeiru, tinan-2020 ho modu utiliza pesa kareta nian hanesan kompresór AC (Air Conditioner) ne’ebé hatama ba iha kompresór laran no solda metin, atu nune’e bele dezvia atensaun hosi aturidade sira. Maibé bainhira ekipa konjuntu halo investigasaun no tesi kompresór ne’e mak hetan droga  iha kompresór laran no falun metin ho plastiku kór kinur ne’ebé haruka liuhosi Ajénsia DHL iha loron-17, fulan-dezembru, tinan-2019 ho aviaun Citilik.

Prokuradora Repúblika Drª. Lidia Soares hatutan kazu droga ne’e sekuésia hosi kazu droga anteriór ne’ebé kazál Timoroan lori ba Atambua-Indonesia iha loron-29, fulan-maiu, tinan-2019.

Iha  fatin hanesan komandate PNSIK Superientendente Xefe José Maria Neto dehan maske PNSIK menus rekursu maibe ekipamentu naton, nune’e sira-nia parte kontinua halo servisu másimu hodi evita ema lorii droga tama mai Timor Leste.

Iha parte seluk Diretór Jerál HNGDV, Aniceto Cardoso Barreto dehan mós katak, haree hosi kontestu saúde nian bainhira ema konsumu bele estraga ema nia saúde. Droga nu’udar substánsia kímiku ida ne’ebé bainhira uza nia la’os de’it fó satisfasaun ruma ba ema, maibe sei afeta liu ba ema nia órgaun sistema hotu-hotu.-

Iha fatin hanesan dr.º Aniceto Cardoso, husu ba juventude Timor Leste atu kuidadu sira-nia an hodi labele tama iha promiskuidade (ranxu livre) no atu labele konsumu droga sá de’it hodi estraga sira-nia vida.

Serimónia destruisaun asiste diretamente hodi Prokuradór Jerál Repúblika Dr. José da Costa Ximenes akompaña husi ekipa MP nian. (Media MP)