BOBONARO-Sesta, loron-13, fulan-Maiu, tinan-2022, Ministériu Públiku liuhusi ninia Gabinete Sentrál Kombate Korrupasaun no Kriminalidade Organizadu ne’ebé koopera hamutuk ho Polisia Nasional Timor-Leste (PNTL) Munisípiu Bobonaro, sunu objetu kontra bandu iha área Sekar, aldeia Tunubibi, suku Tapo-Memo, postu administrativu Maliana, munisípiu Bobonaro.
Prokuradór Dr. Rogerio Viegas Vicente hateten bazeia ba desizaun husi Tribunál nian iha indisiu ne’ebé forte katak iha objetu balun ne’ebé sidadaun sira hatama ho dalan ilegál husi Atambua, munisípiu Belu, Nusa Tenggara Timur (NTT), lndonezia ba iha territóriu Timor-Leste liuhusi fronteira terrestre suku Gildapil, postu administrativu Lolotoe, munisípiu Bobonaro.
Objetu autu operasaun hirak-ne’ebe mak destroi ona hanesan; sigaru marka Surya 12 hamutuk karton 39 ho nia slop 79 no sigaru Pohong-Sagu hamutuk karton 76 ne’ebe polisia halo apreensaun iha área Mologen, suku Oe-leu, postu administrativu Bobonaro iha fulan hirak liubá.
Prokuradór Titular ba Prosesu Nuc # 0017/22 Gcc, Dr. Rogerio Viegas Vicente esplika liután katak prosesu destroisaun ne’e kumpre de’it despaxu husi Tribunál katak objetu hirak-ne’e maioria uza sticker lndonezia nian ne’ebé lei bandu atu sirkula iha merkadu.
Prokuradór ne’e mós hateten katak destroisaun ne’ebé halo ba iha objetu hirak-ne’ebá haktuir ho lei, liuliu dekretu-lei ne’ebé ko’alia kona-ba kontrolu tabaku, no Ministeriu Saúde rasik fó-sai ona katak sigarru sira ne’ebé atu tama mai, tenke halo uluk teste no hetan autorizasaun husi parte sira saúde nian, ho ninia objetivu atu kontrola volume nikotina, nune’e, labele prejudika ba kestaun saúde.
Hafoin prosesu destroisaun, Ministériu Públiku hamutuk ho PNTL no sasan nia na’in sei asina akta hanesan prova ida katak objetu hirak-ne’e halo ona destroisaun no akta ne’e rasik sei junta iha prosesu laran hodi kontinua hala’o julgamentu iha Tribunál.
Ikusliu, Dr. Rogerio hateten katak desizaun Tribunál nian hodi halo de’it destroisaun ba iha objetu apreendidus, maibé ba aktu krime ne’ebé sira komete ba ne’e konserteza prosesu investigasaun la’o normál, no ha’u labele ko’alia kona-ba substansia husi prosesu sira ne’e tanba sei sai hanesan segredu justisa nian. (Media PJR)