Dili-Sesta, loron-07, fulan-junllu, tinan-2023, Prokuradór Jerál Repúblika Dr. Alfonso Lopez, simu vizita kortejia ida husi Komandante Jerál PNTL Komisariu Jerál Polisia Henrique da Costa no Segundu Komandante Jerál Komisariu Polisia Pedro Belo, iha vizita ida ne’e hodi Hametin liutan Kordenasaun servisu no fortifika liutan Relasaun Institusionál.
Prokuradór Jerál Repúblika Dr. Alfonso Lopez hateten prejensa Komadante Jerál no Segundu Komandante Jerál iha Prokuradoria Jerál Repúblika (PJR) ne’e, di’ak tebes hodi hametin liután relasionamentu institusionál liu-liu PNTL ho Ministeriu Publiku (MP) tanba iha artigu 147 konstituisaun RDTL knar PNTL nian defende legalidade no seguransa interna ba sidadaun hotu iha timor laran tomak no artigu 132 knar Ministériu-Públiku reprezenta Estadu, hala’o asaun penál, hametin defeza ba labarik sira, ema ne’ebé laiha, no inkapasitadu sira, defende legalidade demokrátiku no promove banati tuir lei.
PJR hatutan tan katak, husi vizita ida ne’e ita fortifika tan ba oin ho lideransa husi Komandante nain rua (2) ita reforsa liutan tanba iha nivel nasionál iha relasaun di’ak liu-liu ba investigasaun tantu iha sosializasaun no formasaun persija kontinua nafatin atu nune’e ita bele hetan investigasaun ida ne’ebé susesu nune’e wainhira MP akuza ho dignidade no wainhira laiha evidensia mos arkiva (taka) ho dignidade hotu-hotu lao tuir lei.
Vizita ida ne’e hanesan primera faze no ba oin PJR mos sei vizita PNTL atu ba hare Laboratoriu Forensik PNTL nian hodi haree kona-ba Finger Print (Liman Leut) ne’ebé maka uza produtu modernu entaun PGR ho Ekipa sei marka loron ida atu bele ba vizita iha neba.
Relasiona ho kazu barak ne’ebe PNTL aprejenta ba MP no lori ba Tribunál liberta ou absolve Prokuradór Jerál Repúblika esplika membru PNTL ne’ebé maka destaka iha Investigasaun Kriminál sira tuir ona treinamentu no formasaun nune’e iha esperensia kapas tebes maibe hafoin hetan tia promosaun muda fali ba unidade seluk entaun foun tama tenke hahu husi zero no tenke adapta no formasaun fali ida ne’e maka akontese, entaun presiza haree kestaun ida ne’e liu-liu PNTL tenke iha komunikasaun forte ho Prokurador nudar titulár ba asaun penál tenke metin tanba lori kazu ba Tribunál ne’e la’os ba teatru maibe tenke aprejenta kazu ho evidensia ne’ebé maka forte.
Iha enkontru ne’e Prokurador Jeral akompaña husi Adjuntu Prokuradór Jerál Repúblika Dra. Angelina Joanina Saldanha no Dr. Jacinto Soares Babo.(Media MP)