DILI – Ministériu Públiku timorense kongratula Dr. Karim Khan QC, ne’ebé resentemente eleitu nu’udár Xefe Prokuradór ba Tribunál Penál Internasionál – TPI/ International Criminal Court – ICC. Dr. Karim Khan QC ho nia espoza Shyamala Alagendra ne’e nu’udar amigu boot Ministériu Públiku Timor-Leste nian, ne’ebé sempre apoiu prokuradór timoroan sira iha kualker momentu iha rai laran tantu iha rai liur.
Iha okaziaun hanesan, Prokuradór-Jerál Repúblika Timor-Leste, Dr. José da Costa Ximenes, lori naran pesoál no lori instituisaun Ministériu Públiku nia naran hato’o votus susesu ba Dr. Karim Khan QC atuál eleitu nu’udar Xefe Prokuradór iha Tibrunál Penál Internasionál nian, no manifesta nia apoiu tomak ba Dr. Karim Khan QC, no fiar katak sei lori prosesu tomak tuir dalan justisa nian.
Nu’udar belun boot Ministériu Públiku Timor-Leste nian, iha tinan hirak liuba (2017,2018 no 2019) Dr. Karim Khan QC akompaña husi Dra. Shyamala Alagendra sempre dezloka mai Timor-Leste hodi partilla esperiensia ne’ebé sira iha ba Majistradu timoroan sira, autor judisiáriu sira seluk inklui investigadór no autoridade polisiál sira.