Suai, Segunda, loron-16, fulan-novembru, tinan-2020, ekipa formadór husi Prokuradoria Jerál Repúblika fó formasaun ba Ofisiál Justisa sira ho matéria formasaun mak hanesan Tramitasaun ba Inkéritu no Sistema Inkéritu Jestaun Informátika (SIGI), iha Prokuradoria Distritál Suai (PDS).
Objetivu formasaun ba Ofisiál Justisa sira hodi eleva sira-nia koñesimentu, atu bele hala’o kna’ar ba atendimentu prosesu sira ho di’ak liutan iha futuru.
Diretór Rekursu Umanu PJR, Noémio da Silva, hatete katak, atividade formasaun ida-ne’e ho objetivu atu hasa’e koñesimentu ba funsionáriu Ofisiál Justisa sira iha área Tramitasaun Inkéritu no sistema SIGI ne’ebé mak sai problema iha servisu loroloron ni’an, aleinde ne’e mós ko’alia oituan kona-ba fontes orsamentu hodi finansia formasaun ida-ne’e mai husi fundu Kapitál Umanu (FDCH) nian.
Diretór Rekursu Umanu PJR mós subliña tan katak, formasaun ida-ne’e sei la remata iha ne’e de’it maibé sei kontinua iha tinan oin mai tanba planu asaun anuál Ministériu Públiku nian ba programa ne’e kontinua la’o, atu nune’e fó nafatin kapasitasaun ba Majistradu, Ofisiál Justisa no funsionáriu sira hodi bele aumenta sira-nia koñesimentu di’ak liután ho nune’e bele hala’o funsaun ho efisiénsia no efikásia.
Iha sesaun enseramentu ne’e Prokuradór Distrital Suai, Dr. José Elo dehan, servisu di’ak tenki iha vontade ne’ebé di’ak no ohin bele simu formasaun di’ak husi formadór ne’ebé mak di’ak maibé kuandu ita la aplika sei la vale buat ida.
Prokuradór Distritál Suai rekonhese katak prosesu iha Prokuradoria Distritál Suai, oituan, maske iha Prokuradór na’in haat, ho ofisiál justisa ne’ebé la sufisiente maibé nia fiar katak tinan ida-ne’e mézmuke prosesu sa’e iha Munisípiu Bobonaru maibé iha Munisipiu Suai prosesu tun, tanba ne’e fiar ba ita-boot sira katak rezultadu husi formasaun ne’e sei sai di’ak tebes.
Prokuradór Distritál mós espera katak formasaun sei kontinua, sei la para iha ne’e maibé husu atu hanoin mós hodi fó tan formasaun iha área sira seluk ba ofisiál justisa no funsionáriu rejime jerál atu nune’e sira mós bele serbisu badinas no bele aplika ba promosaun judisiáriu aleinde mós ba funsionáriu rejime jerál sira iha futuru. Partisipante ba formasaun ne’e hamutuk ema na’in 7 (hitu) inklui sekretáriu PDS.
Entretantu, Dr. Óscar Silva Tavares hanesan mós formadór, fiar katak, ba oin bele iha mudansa hosi rezultadu inkéritu nian, no rezultadu inkéritu ne’e tenke di’ak, dala ruma iha prátika ita hasoru difirente maibé tenkie mantein saida mak ita-boot sira simu ona iha formasaun no tenki aplika ba iha serbisu loroloron nian, atu nune’e bele transmite ba Prokuradór sira tenke ho di’ak, aleinde organiza mós prosesu sira ho di’ak. (Media MP