Dilí-Segunda, loron-06, fulan-Maiu, tinan-2019, Prokuradór-Jerál Repúblika (PJR), Dr. José da Costa Ximenes, hato’o relatóriu servisu Ministériu Públiku (MP) nian, durante fulan Abril ba Prezidente Repúblika (PR), Dr. Francisco Guteres Lú-Olo iha palásiu Prezidente Bairru-Pité.

PJR informa kona-ba ba atividade MP nian durante fulan Abril “formasaun ba sekretáriu no eskrivaun-de-direitu sira termina ona iha loron-05, fulan-Abril, tinan-2019, hosi formandu nain hitu ne’ebé konkorre ba sekretáriu pasa hotu, nain sanulu resin ida ba eskrivaun diretu nain rua mak la pasa, totál formandu nain sanolu resin ualu (18) no formandu nain sanolu resin neen (16) mak pasa, dadaun ne’e ami ajenda ona ba Konsellu Superiór Ministériu Públiku (KSMP) atu bele desidi kolokasaun iha tempu tuir mai”.

Nia realsa tan katak “Sekretáriu sira tuir Estatutu MP nian, ofisiál justisa sira iha kategoria tolu, ofisiál dilijénsia, eskrivaun-de-direitu no sekretáriu, kona-ba sekretáriu sira mak diriji  Prokuradoria Distritál ida-idak, hanesan Prokuradoria Distritál Baucau (PDB), Prokuradoria Distritál Suaí (PDS), Prokuradoria Distritál Dili (PDD) no Prokuradoria Distritál Oe-cusse (PDO) nune’e mós tuir lei bele haree mós posiblidade bele nomeia sekretáriu superiór nain ida” tenik Prokuradór-Jerál Repúblika.

Iha biban ida-ne’e, Prokuradór-Jerál Repúblika informa mós rezultadu investigasaun kazu omisídiu balun, “kazu omisídiu ne’ebé akontese iha Kuluhun-debaixu, sira ne’ebé involve iha indikasaun membru Polísia Nasionál Timor-Leste (PNTL) nain-4, ita konklui ona no halo ona akuzasaun, iha loron-30, fulan-Abril no ramata ona ba Tribunál Distritál Dili (TDD), hodi bele dezigna data julgamentu, hosi arguidu nain haat ne’e, nain rua nia prosesu desidi arkiva, tanba rezultadu ezame balístiku, konklui vitima sira ne’e mate kauza hosi bala musan ne’ebé sai hosi ema nain rua ninian, ne’ebé dadaun ne’e iha hela prizaun preventiva”.

Aleinde ne’e Prokuradór-Jerál Repúblika informa mós konaba kazu abuzu seksuál ba menoridade ida iha Oe-cusse “ iha loron-25, fulan-Abril, MP promove ba Tribunál Distritál Oe-cusse (TDO) hodi detein arguidu ida hanesan mós Padre, ho inisiál RD, tanba iha indikasaun komete krime abuzu seksuál ba menór, halo ona primeiru interrogatóriu iha loron-26, fulan-Abril, depois ita aprezenta iha loron-26, fulan-abril tinan-2019, MP promove primeiru para afasta arguidu refere labele hela nafatin iha Oe-cusse, tanba bele iha perigu ba menór sira seluk, nune’e TDD konkorda  no afasta tiha ona hosi Oe-cusse, Tribunál mós halo tiha ona apreensaun ba pasaporte arguidu nian, no mós afasta tiha ona hosi Oe-cusse hahú  iha loron-28, fulan-Abril tinan ida ne’e”. (Media MP)