PDB ─ Iha Sesta, loron-12,
fulan-Abril, tinan-2019, Xefe Prokuradoria Distritál Baucau, Dra. Remizia de
Fátima do Rosário ho Prokuradór Repúblika Dr. Luis Hernani Rangel da Cruz fó formasaun
ba entidade Judisiária sira, formasaun ne’e, hala’o iha sala enkontru PNTL iha Munisípiu
Baucau.
Entidade Judisiária sira ne’ebé partisipa iha
formasaun refere ne’e mak hanesan Polísia Seksaun Investigasaun Kriminál,
Polísia Trânzitu, inklui mós BOP no F-FDTL sira husi seksaun justisa nian.
Objetivu hosi formasaun ne’e mak atu fó koñesimentu
no hasa’e kapasidade kona-ba oinsá atu halo investigasaun ne’ebé di’ak
relasionadu ho krime sira bazeia ba jéneru nian, no bele haktuir ho prosedimentu
legál sira, no oinsá rekolla no asegura provas sira hodi ajuda deskobre
lia-loos no buka hatene kona-ba ninia impaktu no konsekuénsia sira iha krime
insestu no krime sira violénsia seksuál nian ne’e.
PNTL
mak nu’udar ajénsia seguransa komunidade nian, nune’e, tenke kontinua hatudu
profisionalizmu atu povu bele laran-metin ba Polísia Nasionál Timor-Leste
(PNTL), no nu’udar kuadru PNTL nian sira tenke hatudu ezemplu ne’ebé di’ak
ba komunidade sira.
Iha
biban ne’e, Prokuradór sira mós kontinua enkoraja no husu membru Polísia
Nasionál Timor-Leste (PNTL) sira, liu-liu PNTL Munisípiu Baucau nian atu
kontinua asegura ka garante kualidade husi sira-nia atuasaun. Liu-liu oinsá atubele
garante kualidade investigasaun husi membru sira ne’ebé servisu iha área
investigasaun kriminál nian.
Aleinde ne’e, iha
loron-10, fulan-Maiu, tinan-2019, Prokuradór sira mós fó formasaun ba ofisiál justisa Tribunal
Distritál Baucau, ofisiál justisa Prokuradoria Distritál Baucau, Polísia Trânzitu,
Polísia BPU no Task Force hodi hasa’e kapasidade no garante kualidade servisu investigasaun
kriminál. (Reponsavel/PDB)