Baucau – Iha Kinta, loron-30, fulan-Janeiru, tinan-2020, Prokuradór Repúblika Dr. Bartolomeo de Araujo hala’o programa sensibilizasaun kona-na papél MP nian ba komunidade sira iha Suku Atelari, Postu Administrativu Laga, Munisipiu Baucau.
Objetivu Prinsipál husi sensibilizasaun ida-ne’e mak atu fahe informasaun ba komunidade sira iha área refere ne’e, kona-ba kna’ar Instituisaun Judisiáriu sira nian inklui mós kna’ar Ministériu Públiku nian bainhira reprezentante vitima, feto no labarik sira tuir Konstituisaun no Lei, aleinde ne’e fahe mós informasaun ba komunidade no lider komunitáriu sira oinsá atubele hetan asesu ba justisa Durante hala’o sensibilizasaun ne’e, Prokuradór Repúblika Dr. Bartolomeo deAraújo hateten katak; “Ministériu Públiku mak reprezenta Estadu, ezerse asaun penál, hametin defeza ba labarik sira, ausentes, no inkapazes sira, defende legalidade demokrátika no promove kumprimentu ba lei” ne’ebé mak hakerek ona iha Konstituisaun RDTL Artigu 132.
Iha biban ne’e, Prokuradór Distritál ne’e esplika liután ba komunidade sira oinsá atu prosesa kazu ida hodi bele la’o to’o remata no hato’o mós ba komunidade sira katak bainhira hetan abuzu ruma husi ema seluk bele hato’o keixa direitamente ba Polisia no Ministériu Públiku.
Dr. Bartolomeo esplika ba komunidade sira katak, iha ita-nia rai eziste tipu krime rua hanesan krime públiku no krime semi-públiku; krime públiku haree liu ba krime sira hanesan Krime violénsia domestika, violénsia seksuál, omisídiu, no krime semi-públiku kobre ba krime sira hanesan tuirmai; ofensa intergridade simples, abuzu podér, falsifikasaun dokumentu, laiha karta kondusaun, la kumpri obrigasaun alimentár, husi tipu krime rua ne’e hamosu krime lubuk ida ho nia natureza oioin.
Prokuradór Repúblika ne’e esplika liután ba komunidade sira oinsá atu prosesa kazu ida la’o to’o remata no husu mós ba komunidade sira bainhira ema ruma hasoru problema, entaun vítima rasik mak bele hato’o keixa ba iha autoridade PNTL sira no bele mós hato’o direta ba MP. Tanba prosesamentu ba kazu refere ne’e ninia durasaun to’o fulan neen no vítima sira tenki ba aprezenta an.
Komunidade hirak-ne’ebé mak partisipa iha sensibilizasaun ne’e hamutuk ema-na’in neennulu resin no painelista sira mai husi; Ministériu Públiku, Komandante PNTL, Xefe Departamentu Florestas, Diresaun Terras Propriedade, Diresaun Notariadu no STAE.(Media PJR)