BAUCAU – Prokuradoria Repúblika Distritál Baucau (PDB), iha fulan-outubru nia laran, hala’o formasaun ba membru Polísia Nasionál Timór-Leste (PNTL) hosi Servisu Investigasaun Kriminál no Unidade Tránzitu sira iha Munisípiu Baucau no Lautém.
pntlFormasaun refere hanesan kontinuasaun programa formasaun ne’ebé Ministériu Públiku (MP) oferese ba PNTL, ho matéria sira mak hanesan transmitasaun inkerítu, kompétensia MP no knaar PNTL nian iha ámbitu Kódigu Prosesu Penál, nomós téknika investigasaun iha aktu prosesuál nian.

Iha Lautém, atividade refere hala’o tersa-feira (11/10/2016), iha edifísiu Kuartel Jerál PNTL Lautém nian. Prokuradór Repúblika Luis Hernani Rangel da Cruz mak sai formadór ba partisipante sira na’in 30, inklui komandante eskuadra lima ne’ebé iha. Tuir mai, iha kinta-feira (13/10/2016), Prokuradora Repúblika Benvinda da Costa do Rosário fó formasaun ba membru PNTL sira hosi Munisípiu Baucau na’in 32, mós inklui komandante eskuadra ne’en hotu.
Programa formasaun ba PNTL ne’e hala’o hosi MP dezde tinan-2010 liu ba ho nia objetivu mak hasa’e membru polísia sira-nia koñesimentu kona-ba lei no prosedimentu sira nomós hametin nafatin kordenasaun no koperasaun servisu di’ak entre MP no PNTL.