Díli-loron–15, fulan-Outubru, tinan-2019, Prokuradór Distritál Díli (PDD) Dr. Jacinto Babo, delega ona Prokuradór Repúblika Dr. Gustavo A. Da Silva Moreira, Dr. Pedro Baptista no Dra. Ivona Guteres hodi fó formasaun ba Polísia Nasionál Servisu Investigasaun Kriminál (PNSIK) no Polísia Unidade Tránzitu hosi Munisípiu Ermera, Díli, Liquisa no Aileu iha salaun Komandu PNTL Munisípiu Díli. Formasuan ne’e rasik kobre kona-ba krimi violénsia doméstika, prosedimentu investigasun ba rejimi komún iha ambítu kódigu prosesu penál no kódigo penál no mós prosedimentu investigasun ba krimi komún iha ambítu kódigu prosesu penál no kódigu penál rodoviáriu.
Iha abertura formasaun ne’e, Prokuradór Distritál Díli, Dr, Jacinto Babo hato’o obrigadu ba Komandu PNTL Munisípiu Díli, “hanesan Prokuradór Distritál Díli, ha’u hato’o agradese wain ba Komandante Distritu tanba oferese ona fatin ida-ne’e hodi ita bele halo formasaun ne’e, no kuaze formasaun sira ne’ebé mak ita halo, ami sempre koordena ho Komando Distritu Díli hodi utiliza fatin ida-ne’e”.
Prokuradór Distritál Díli ne’e akresenta tan katak, “atu dehan de’it katak formasaun ida-ne’e hanesan kontinuasaun hosi formasaun ida ne’ebé uluk ha’u sei iha-ne’e. Ita-bo’ot sira kestiona kona-ba formasaun ne’ebé mak nunka akontese, depois ita ba vizita iha Aileu, Díli, Liquisa no Ermera, ita-bo’ot sira koloka kestaun sira ne’e, entaun, ita buka meius, nune’e mak iha fulan hirak liubá ita realiza ona formasaun, iha Ermera mak ketak maibé Liquisa, Aileu, Díli sempre iha fatin ida-ne’e”.
Nia tenik tan katak “komunikasaun entre Prokuradór ho Polísia Investigasaun Kriminál no tránzitu sira tenki halo ho efetivu no beibeik, Polísia Investigasaun Kriminál ho tránzitu sira tenke hatene turnu Prokuradór sira nian, tanba ne’e mak tenke mantein ita-nia liña koordenasaun, liuhosi ita-nia servisu ne’e hatudu katak prosesu sira iha fulan ne’en nia laran, ita konsege simu prosesu kuaze 3.000, bainhira ha’u mai iha Prokuradór Distritál Díli, hafoin agora ita konsege redús ona ba 2.400, signifika katak ita halo redusaun ho gradualmente”.
Iha fatin hanesan, Komandante Polísia Munisipiu Díli, Superintendente Xefe, Armando Monteiro, iha ninia diskursu abertura nian hatete katak, “ba dahuluk ha’u lori estrutura Komandu PNTL Munisípiu Díli nia naran husu ba formandu sira atu uza oportunidade ida ne’e ho di’ak, no mós agradese ba inisiativa PDD nian ne’e, ida-ne’e la’ós mak primeira vez, maibé iha tinan naruk ona Komandu PNTL Díli ho Prokuradór sira, liuhosi Dr. Jacinto Babo, tantu ha’u iha Díli ka Maliana, sempre iha koordenasaun no komunikasaun hodi fahe esperiénsia liuliu kona-ba kapasitasaun servisu investigasaun kriminál inklui mós servisu seguransa rodoviáriu”.
Nia apela mós ba partisipante katak, “iha oportunidade ida-ne’e husu ba ita na’in hirak ne’ebé mak ohin loron marka presenza, hodi uza oportunidade ida-ne’e atu konsentra no akompaña aprezentasaun materia hosi ita-nia prokuradór sira, no nia finalidade hosi formasaun ida-ne’e bele aumenta no dezenvolve ita-nia kapasidade, liuliu ba servisu investigasaun kriminál no servisu tránzitu rodoviáriu ninian”.
Iha biban ne’e, Prokuradora Repúblika, Dra. Ivonia Guterres ne’ebé mós nu’udar formadora, konsidera katak formasaun ne’e importante tebes hodi bele hasa’e koñesimentu membru PNTL sira ligadu ho prosesu sira, kualkér kazu ne’ebé akontese Polísia bele halo prosesu tuir faktus hodi rekolla prova sira ho evidénsia forte, nune’e, bele lori prosesu ne’e ba Ministériu Públiku hodi prosesa tiha tuir lei, “formasaun ne’e ami halo beibeik ba polísia investigasaun no polísia tránzitu sira, tanba haree ba natureza servisu nian ne’ebé iha relasun hamutuk entre polísia ho Ministeriu Públiku, aleinde ne’e hodi hasa’e ita-nia polísia sira-nia koñesimentu oinsá mak buka meius atu rekolla provas ruma”. (Media PJR).