Dili-Prokuradór Distritál Dili, (PDD)  Dr. Jacinto Babo, iha loron-14, fulan-Setembru, tinan-2020 fó formasaun  ba Polísia investigadór nain-30 iha Akademia Polísia Comoro, investigadór sira ne’e mai hosi Munísipiu-12 inklui mós RAEOA, materiál ba formasaun ne’e mak hanesan, agresaun seksuál, tipu agresaun seksuál tuir, kódigu penál, konsekuénsia hosi agresaun seksuál hasoru vitíma sira, métodu investigasaun no rekolla prova sira.

PDD hateten “objetivu hosi formasaun ne’e, atu kapasita investigadór sira iha faze investigasaun ba kazu sira violasaun seksuál, tanba ikus-ikus ne’e kazu violasaun seksuál sempre akontese iha fatin barak, hatete Dr. Babo.

Iha Dr. Babo nia esplikasaun subliña mós katak, “ha’u husu investigadór sira atu estuda didi’ak kona-ba kazu abuzu seksuál hasoru menór, agresaun seksuál, tanba kazu ne’e mai hosi obriga no amesa ka promete buat balun, nune’e mós kazu ne’e akontese laiha sasin nune’e ita tenke investiga ho didi’ak atu nune’e akuzasaun bele forte no bazea ba faktu sira”.

Aleinde PDD esplika kona-ba prosesu inverstigasaun nune’e mós nia fó ezemplu ba kazu konkretu balun ne’ebé agora dadaun iha hela prosesu investigasaun nia laran, hanesan fatin Karaoke nian balun, ema ba atu karaoke, maibé karaoke hotu sira halo tranzasuan umanu ba feto sira ne’ebé ba karaoke ne’e, tanba ne’e ita tenke halo investigasaun ne’ebé klean atu nune’e bele rekolla prova sira, tanba ne’e kazu tráfiku umanu sempre servisu iha ekipa, atu nun’e ita bele.

Nia husu mós katak, vítima ba violasaun seksuál sempre lakon buat lubuk ida, nia sente nia an la vale iha komunidade nia leet, nia tenke izola an iha uma de’it, nia ativadade hotu supende tanba nia sente moe ho hahalok suspeitu nian. (Media MP)