Díli-Polísia Investigasaun Kriminál ho Tránzitu hosi Munisípiu Díli, Aileu no Liquiçá hamutuk ho ofisiál Justisa Prokuradoria Distritál Díli (PDD) iha sesta feira, loron-10, fulan-Maiu, tinan-2019, tuir formasaun kona-ba Prosedimentu Investigasaun ba krime Violénsia Doméstika bazeia ba Jéneru no krime komún sira relasionadu ho Kódigu Prosesu Penál no Kódigu Penál, iha salaun PNTL Munisípiu Díli-Caicoli.

Prokuradór Repúblika Distritál Díli (PDD), Dr. Jacinto Babo nia abertura informa katak “objetivu formasaun ba Ofisiál Justisa ho Polísia investigasaun no tránzitu ne’e, hodi uniformiza informsaun, tanba dala barak  Polísia ho Ofisiál Justisa halo formasaun keta-ketak, Prokuradór sira ketak, depois iha dezentendimentu ba malu, tanba ne’e mak ohin ita mai iha ne’e atu fahe informasaun konaba ita-nia esperiénsia sira”.

Ha’u fiar katak dúvida hirak ne’ebé ita hasoru durante ne’e ita sei koloka hodi buka solusaun, tanba ita lubuk ida ne’e nu’udar ekipa ida ne’ebé atu fó susesu ba prosesu sira, tanba sira iha Tribunál ne’ebá hein rezultadu finál de’it, nune’e ita hotu mai iha ne’e atu fahe informasaun ba malu kona-ba difikuldade sira ne’ebé ita infrenta durante ne’e liuliu kona-ba prosesu sira, tanba ita-nia objetivu ida de’it mak, fó justisa ba maluk sira ne’ebé buka justisa, dehan Prokuradór Distritál Díli.

Nia akresenta tan katak “formasaun ida ne’e realiza nu’udar sekuensia hosi vizita PDD ba Munisípiu sira, bainhira hetan pose iha fulan-Dezembru, tinan-2018, kolega Polísia Investigasaun Kriminál no Tránzitu koloka asuntu lubuk ida ne’ebé pertenente tebetebes, tanba ne’e PDD hamutuk ho Prokurdór Repúblika sira halo planu hodi halo formasaun, nune’e ohin realiza ita-nia formasaun ne’e”.

Formasaun ne’e realiza tanba hetan apoiu hosi  United Nations Development Programme (UNDP), “ita iha problema orsamentu, tanba ne’e mak ita husu apoiu ba UNDP hodi fasilita formasaun ida ne’e, ita hahú kedas iha loron-2, fulan-Maiu, tinan-2019, ba Ofisiál Justisa ho Polísia Investigasaun Kriminál iha Munisípiu Ermera”, tenik nia.

Prokuradór Distritál Díli ne’e realsa tan katak “formasaun ida ne’e tempu ba ita loron ida la sufisiente, maibé ita tenke halo duke laiha liu, ida ne’e hanesan inísiu ida atu halo planu tuir mai atu hetan tan formasuan,  tanba tuir planu kada fulan-neen formsaun dala ida ba Polísia Investigasaun Kriminál ho Ofisiál Justisa sira iha PDD”,

Formadór ba formasaun ne’e mak Prokuradór Repúblika sira hosi Prokuradoria Repúblika Distritál Díli nian nune’e mós molok hala’o formasaun iha Munisípiu Díli, formasaun hanesan realiza tiha mós iha Munisípiu Ermera, entretantu partisipante ba formasaun refere mai hosi Ofisiál Justisa Prokuradoria Repúblika Distrtál Dili, Polísia Investigasaun Kriminál ho Polísia Tránzitu sira, (Media MP).