Manufahi-Tersa, loron-22, fulan-Setembru, tinan-2021, Prokuradoria Distritál Suai ho PNTL Manufahi entrega motorizada apreendidu hamutuk sanulu resin ida (11) ba Diresaun Nasionál Patrimóniu Estadu, no destroi kapasete hamutuk tolunulu resin ualu (38). Apreensaun ba sasán hirak-ne’e hala’o tiha durante fulan-Novembru, tinan-2020 to’o fulan-Janeiru, tinan-2021, tanba la kumpri padraun kona-ba seguransa tránzitu nian.

Iha eventu ida-ne’e, Komandante PNTL Munisípiu Manufahi Joni Viana das Regras hateten katak apreensaun ba motorizada sanulu resin ida (11) ne’e akontese bainhira polísia sira husi Servisu Seksaun Tránzitu Manufahi nian hala’o checkpoint ba sira ne’ebé viola regras tránzitu haktuir Lei Kódigu Estrada nian. Apreensaun ba motorizada hirak-ne’e komesa kedas tempu misaun ONU nian iha Timor-Leste, ne’ebé hahú iha tinan- 2005 to’o  tinan-2008 no kontinua to’o tinan-2021. No motorizada ninia na’in  la mai halo reklamasaun, nune’e, PNTL Manufahi halo identifikasaun hodi aprezenta ba MP hodi lori ba iha Tribunál Suai atubele foti desizaun  tuir artigu 173 n^o 1, KPP, nune’e evidénsia hirak-ne’e bele sai nu’udar patrimóniu estadu nian.  Ohin-loron evidénsia hirak-ne’e entrega tiha ba Diresaun Nasionál Patrimóniu Estadu.

Nia hatutan, PDS  rekere ba meritizmu Juíz hodi halo avaliasaun ba objetu apreendidu sira ne’e haktuir ho artigu 172 no 2 husi KPP, aleinde ne’e haree mós valór husi objetu apreendidu refere no mós bainhira rai kle’ur sasán sira ne’e bele sai aat no ninia fatin la seguru. Haktuir art.48 no 2 aliña C. no art.172 no 4, nune’e Tribunál deklara evidénsia hirak-ne’e afavór ba estadu.

Iha sorin seluk,  Xefe Diresaun Monitorizasaun Nasionál Patrimóniu Estadu Cipriano do Rojario hateten katak sasán apreendidu ne’e sira  simu ona husi  PDS no PNTL Manufahi, no sira sei entrega filafali motorizada hirak ne’e ba Diresaun Patrimóniu Estadu Munisipiu Manufahi hodi halo alinasaun ka lelaun de’it iha Munisípiu Manufahi.

Iha eventu entrega motorizada hirak ne’e, hetan partisipasaun husi Komandante Jerál Munisípiu Manufahi, Sekretáriu PDS, Diretór Nasionál Patrimóniu Estadu, Xefe Diresaun Monitorizasaun Nasionál Patrimóniu Estadu, no Xefe Lojistika Munisípiu Manufahi nian (Media MP).