Ainaro-Prokuradór Distritál
Suai (PDS), Dr. José Elo, iha loron-30, fulan-Maiu, tinan-2019, foin lalais
ne’e, halo vizita kortejia ida ba Eskuadra
PNTL Munisípiu Ainaro hodi hametin liután kooperasaun entre Polísia Nasionál Timor-Leste
(PNTL) Munisípiu Ainaro ho Prokuradoria
Distritál Suai.
Prokuradór Distritál Suai liuhosi sorumutu ne’ebé realiza
iha edifísiu PNTL Munisípiu Ainaro hatete katak objetivu hosi ninia vizita ne’e
atu hametin liután kooperasaun entre PNTL Munisípiu Ainaro ho Prokuradoria
Distritál Suai, “atu hala’o servisu ne’ebé di’ak, entaun presiza halo koordenasaun
no hametin relasaun nafatin ho PNTL, liuliu ba área hirak-ne’ebé mak sai nu’udar jurisdisaun
Prokuradoria Distritál Suai nian hanesan; Cova-Lima, Ainaro Manufahi no
Bobonaro”.
Iha biban ne’e, Prokuradór Distritál Suai mós hatete katak
“kooperasaun ne’ebé hala’o iha distritu 4 ne’ebé tama ba iha área jurisdisaun
Tribunál Distritál Suai no Prokuradoria Distritál Suai ne’e lao di’ak tebes,
liuliu iha Munisípiu Ainaro, ha’u senti kolaborasaun ne’e la’o di’ak tebes ho Polísia,
maske nune’e, ha’u mai nafatin hodi enkoraja ita-boot sira, ha’u mai iha ne’e
tanba ha’u mós foun, Ministériu Públiku ninia servisu sempre kontinua mantein
relasaun ne’ebé di’ak ho Polísia tanba ita-nia servisu barak, liuliu iha parte sira investigasaun nian.
Iha hasoru malu ne’e, PDS husu atu PNTL Munisípiu Ainaro,
liuliu investigadór sira atu mantein nafatin kualidade investigasaun nian “hau
husu nafatin ba Segundu Komandante Distritu Ainaro atu kontinua mantein ita-nia
kualidade investigasaun, tanba Ainaro ho
Bobonaro em prinsípiu di’ak tebes, tuir fali Same ho Suai, tanba ne’e ha’u
enkoraja ita boot sira atu ita iha ligasaun ne’ebé metin nafatin liuliu kona-ba
parte investigasaun nian”.
Iha sorin seluk, Segundu Komandante PNTL ne’e hato’o ninia
bem-vindu ba Dr. José Elo no nia mós hatete katak, “ida-ne’e hanesan primeiru vizita
Prokuradór Distritál Suai ba iha Ainaro,
bem-vindu ba señor Prokuradór Distritál Suai. Prokuradór Distritál na’in hira
troka ba malu ona no ami sempre asisti ida-ne’e, no fiar katak ho vizita ida-ne’e
bele mantein nafatin kooperasaun hanesan iha tempu uluk”.
Iha vizita kortejia ne’e, Dr. José Elo rona diretamente informasaun ne’ebé
hato’o husi Segundu Komandante Asistente
Superintendente Eskuadra PNTL Munisípiu Ainaro, Albino Mauzinho kona-ba númeru
kriminalidade ne’ebé akontese iha Munisípiu ne’e, “hahú hosi fulan-Janeiru to’o
fulan-Maiu tinan 2019, tuir dadus PNTL Munisípiu Ainaro nian katak, kazu barak
liu ne’ebé akontese mak ofensas integridade fizika simples, no kazu sira ne’e rasik rejistu ona iha
Prokuradoria Distritál Suai no la iha prosesu ida mak sei pendente hela iha
PNTL Munisípiu Ainaro, no buat hothotu la’o tuir ninia prosedimentu”..
Nia hatete tan katak “karik
iha posibilidade ruma, entaun másimu tinan ida dala rua ka mínimu tinan dala
ida ami bele hetan netik treinamentu ka workshop, ami mós prontu nafatin atu
hetan orientasaun ruma hosi Prokuradoria Distritál Suai, karik iha agregasaun ka
mandadu ruma, Polisia Munisípal prontu atu kontribui”, (Media PJR).