Suai-Kinta, loron-24, fulan-Setembru, tinan-2021, Prokuradoria Distritál Suai hamutuk ho PNTL Suai entrega motorizada apreendidu hamutuk sanulu resin haat (14) ba Diresaun Patrimóniu Estadu iha resintu PNTL suai.
Iha biban ida-ne’e, Komandante Tránzitu PNTL Suai Patricio de Jesus hateten katak motorizada hirak-ne’e sira preende hahú kedas tempu ONU nian to’o agora, no motorizada ninia na’in nunka mai halo reklamasaun, nune’e, tuir lei bainhira liu ona loron sianulu entaun Estadu mak sei sai na’in ba sasán sira ne’e. No liuhusi vizita kortezia Prokuradór Distritál Suai ba iha PNTL Munisípiu Suai, ami bele hato’o ami-nia preokupasaun kona-ba objetu apreendidu sira ne’e. Tuirmai Prokuradór husu atu ami halo pedidu ba MP hodi hato’o ba Tribunál atubele deklara katak Estadu mak sei sai na’in ba sasán sira ne’e. Nune’e, ohin ami hamutuk ho Prokuradoria Distritál entrega evidénsia motorizada hamutuk sanulu resin haat 14 ba Diresaun Nasionál Patrimóniu Estadu.
Iha sorin seluk, Xefe Diresaun Monitorizasaun Nasionál Patrimóniu Estadu Cipriano do Rojario hateten katak sasán apreendidu sira ne’e sira simu ona husi PDS no PNTL Suai, no sira sei entrega filafali motorizada hirak-ne’e ba Diresaun Patrimóniu Estadu Munisipiu Suai hodi bele halo alinasaun ka lelaun de’it iha Munisípiu Suai.
Iha eventu entrega motorizada hirak-ne’e hetan partisipasaun husi Komandante Tránzitu PNTL Suai, Sekretáriu PDS, Diretór Nasionál Patrimóniu Estadu, Xefe Diresaun Monitorizasaun Nasionál Patrimóniu Estadu, no Xefe Lojistika Munisípiu Suai. (Media MP)