DILI – Prokuradór-Jerál Repúblika (PJR), Dr. José da Costa Ximenes, aprezenta relatóriu ezekusaun Orsamentu Jerál Estadu (OJE) tinan-2016 no espetativa ba tinan-2017 nian ba Komisaun A Parlamentu Nasionál, ba Asuntu Konstitusionál, Justisa, Administrasaun Públika, Poder Lokál no Anti-Korrupsaun. Liuhosi audiénsia públiku ne’e, ne’ebé hala’o iha Parlamentu Nasionál, Sesta (28/10/16), PJR informa kona-ba pedidu adisionál ne’ebé aprova ona hosi governu hodi aloka ba Prokuradoria Jerál Repúblika iha 2017.
“Pakote fiskál ne’ebé guvernu atribui ba Ministériu Públiku ba tinan 2017 la sufisiente hodi kobre ba nesesidade servisu Ministériu Públiku iha territóriu tomak, maibé ami agradese tanba bele reviza tiha hodi aloka osan nato’on ba garante katak instituisaun ne’e bele hala’o servisu justisa di’ak ba sidadaun sira no kontinua dezenvolve nafatin”, dehan PJR.
Proposta governu kona-ba OJE 2017, ne’ebé apresia hela iha Parlamentu Nasionál, aloka ba Prokuradoria Jerál Repúblika montante total US$ 4.127.926. Ida ne’e hatudu katak MP hetan orsamentu Estadu ne’ebé ho montante bo’ot ba dahuluk desde MP hamriik to’o agora hodi halo frente ba dezafiu sira ne’ebé mosu liga ho kombate kriminalidade, prevensaun no asesu justisa kredível, efikáz no atempadu ba ema hotu.
Iha fatin hanesan, Prezidente Komisaun A Parlamento Nasionál, Deputada Carmelita Moniz, hatete katak tuir Komisaun A nia observasaun ezekusaun OJE iha Ministériu Públiku la’o di’ak tebes kompara ho instituisaun judisiáriu sira seluk.
Relasiona ba ezekusaun orsamentu Prokuradoria Jerál Repúblika iha 2016, PJR informa katak la’o ho di’ak. Iha rubrika saláriu no vensimentu ezekuta ona porsentu 74, mesmu iha problema balun kona-ba atrazu atu loke rekrutamentu tanba hein autorizasaun Komisaun Funsaun Públika, pedidu lisensa naun-remunerada hosi funsionáriu balun nst., maibé nia espera molok tinan ne’e remata bele finaliza ona. Problema ne’ebé Prokuradoria Jerál hasoru mak iha ezekusaun ba bens no servisu, tanba osan ne’ebé aloka, liuliu iha iten utilidade sira (ne’ebé uza ba selu eletrisidade, internet no telefone) la sufisiente atu kobre gastu sira hosi nasionál ho tan distritál haat no Prokuradoria Distritu tolu. Maske nune’e, PJR konsege duni halo jestaun ba osan bens no servisu, ho montante US$ 1.176.000, hodi uza osan ne’e to’o tinan ida ramata.
“Ami konsege halo transferénsia hosi rubrika kapitál menór kuaze dólar rihun ida ba bens no servisu hodi apoiu servisu balun, iha rubrika kapitál dezenvolvimentu ita laiha planu 2015 ba 2016, re-orsamentu de’it hosi tinan 2015 ba 2016 tanba atu selu retensaun ba Dili no Distritu balun, portantu ita konsege ezekuta osan US$153.000 resin ba Arquivu Nasionál Krime Grave sira nian”, informa PJR liu hosi audiénsia ne’e. (Media-PJR )