Dili-Sesta, loron-03, fulan-Setembru, tinan-2021, Prokuradór Jerál Repúblika Dr. Alfonso Lopez ho Ekipa Tékniku hala’o diskusaun ho Komité Revizaun Orsamentu Polítika tinan-2022 iha Auditóriu Xanana Gusmão, Ministériu Finansas.
Iha diskusaun ne’e Ministériu Públiku aprezenta ezekusaun OJE tinan-2021 no metas sira prioridade iha MP nian, liuliu kona-ba Konstrusaun edifisiu MP iha Munisipiu Lautem.
Iha biban ida-ne’e, PJR aprezenta ezekusaun OJE MP nian ba tinan-2021 ne’ebé hahú iha loron-01, fulan-Janeiru, tinan 2021, no totál orsamentu ne’ebé Governu atribui ona ba MP hamutuk $ 4,787,430.00 ho ninia detalles mak hanesan Ezekusaun atuál hamutuk $ 2, 211,177.56, Obligasaun hamutuk $ 1,065,518.59 Komitmentu hamutuk $ 118,936.45 no free balance $ 1,391,797.40.
Ezekusaun atuál MP nian ne’ebé aloka ba iha Saláriu no Vensimentu hamutuk $ 1,350, 526.99, Bens no Servisu hamutuk $ 650,792.51, Kapitál Menór $ 69,816.00 no Kapitál Dezenvolvimentu 140,042.06. Gastus sira ne’e hodi sustenta atividade sira MP nian.
Tuirmai, PJR mós esplika kona-ba projetu boot rua ne’ebé mak MP hala’o hela hanesan edifisiu servisu espesializadu no edifisiu PDL, kona-ba projetu edifisiu servisu espesializadu nian ne’e remata ona agora hein de’it atu halo inagurasaun no tanba daudaun ne’e ita infreta hela situasaun atuál ligadu ho konfinamentu obrigatóriu, nune’e hein to’o situasaun normaliza ona mak MP sei konvida PR hodi halo inagurasaun ba edifisiu ne’e, no edifisiu PDL ne’e rasik sei iha proseu konstrusaun, ne’ebé agora atinji ona 47%.
Sorumutu ne’e prezide husi Vise Primeiru-Ministru, Jose Maria dos Reis no hetan partisipasaun husi Ministru Prezidénsia Konsellu Ministrus, Koordenadór Asuntus Ekonomikus, Ministru Finansas, Ministru Administrasaun Estatál, Ministru Edukasaun, Juventude no Desportu, Ministru Transporte no Komunikasaun no mós Vise-Ministru Finansas. (Media MP).