DILI – Prokurador-Jerál Repúblika (PJR), José da Costa Ximenes, hatete katak ba dahuluk númeru krime eleitorál iha territóriu tomak tun ba kazu 10 de’it kompara ho tinan sira uluk hahú hosi 2007 mai to’o iha 2012, ne’ebé mosu krime eleitoral ne’ebé ho númeru boot liu. Informasaun ne’e PJR hato’o hafoin hala’o enkontru ho Prezidente Repúblika, Taur Matan Ruak, iha segunda (03/04/2017).
Entre kazu sira ne’ebé rejistu durante eleisaun prezidensiál sira ne’e, Distritu Judisiál Dili mak rejistu kazu barak liu, hamutuk tolu. PJR mós salienta liu tan katak númeru ki’ik krime eleitorál ne’e bele sai hanesan indikadór ida katak komunidade sira konsiente liu no komprende ona lala’ok demokrasia no prosesu dezenvolvimentu ninian.
Durante enkontru PJR mós hato’o ba Prezidente kona-ba Informasaun Anuál ne’ebé prepara ba Parlamentu Nasionál, aleinde koalia kona-ba realizasaun treinamentu no konferénsia kona-ba Tribunál Penál Internasionál (TPI), ne’ebé sei hala’o iha loron-29 no 30 no realiza hosi PJR hamutuk ho TPI rasik hanesan pasu inisiál hodi ba futuru bele loke oportunidade atu majistradu no profisionál legál timoroan sira envolve iha TPI.
Hatan kona-ba apresiasaun ba iha Lei Pensaun Vitalísia, PJR esplika katak normalmente Tribunál haruka mai PJR husu atu hato’o opiniaun no parte hosi PJR haruka ona ba fali Tribunál. (Média PJR)