Dili, Loron-14, fulan-Novembru, tinan-2023, Prokuradór-Jerál Repúblika (PJR), Dr. Alfonso Lopez, hala’o enkontru ho Prezidente Repúblika (PR), Dr. José Ramos Horta iha nia knaar fatin Palasiu Prezidente, Bairro-Pite.
Iha biban ne’e PJR aprezenta assuntu tolu (3) ne’ebé importante ba PR mak hanesan, Informasaun kona-bá kazu Lourba ne’ebé akontese iha Loron-2 to’o 3 fulan-Novembru, tinan ida ne’e, katak Prokuradór Primeira Instánsia Covalima servisu hamutuk ho Polísia Nasionál Timor-Leste, Investigasaun Munisípiu Bobonaru nian ne’ebé hatama ona partisipasaun ba Prokuradór turnu no enjerál kazu investigasaun refere la’o hela.
Tuir dadus ne’ebé iha MP rejista vitíma ba kazu insendiu Lourba hamutuk na’in tolu nulu (30), uma sia (9) hetan sunu no uma sanulu resin ida (11) hetan estragus, dadaun ne’e suspeitu ba kazu refere provizóriu ema na’in sanulu resin lima (15), maibé hafoin investigasaun husi Orgaun Polísia Kriminál iha posibilidade bele aumenta tan arguidu sira.
Aleim-de ne’e PJR aprezenta mós kona-bá konstrusaun edifísiu MP nian iha Munisípiu Lautem, ne’ebé sei iha prosesu vestória no sei remata iha tempu besik hodi halo termu entrega atu nune’e bele halo inagurasaun iha fulan-Dezembru tinan ne’e.
Entretantu iha enkontru ne’e, ikus liu PJR aprezenta mós movimentu prosesuál, kona-bá rejista kazu entrada liliu iha fulan-Outubru nian hamutuk, atusneen-tolu nulu-resin-lima (635), iha nivél nasionál, no kazu hirak ne’e maiória mak asalta malu, ofensa integridade fizika simples,violénsia domestiku, abuzu seksuál ba menór, relasaun seksuál no omesídiu.
Hosi kazu hirak ne’e, Prokuradór sira halo findus ka remata prosesu hamutuk 395, arkiva 205, depois akuza hodi relata ba tribunál hamutuk 190. PJR mós salienta tan katak totál ba kazu pendente hamutuk 3.255, númeru pendente aumenta ass tanbá efeitu mos husi altersaun ba Kódigu Prosesu Penál, (Media MP).