Dili; Loron-25, fulan-Janeiru, tinan-2022, Prokuradór-Jerál Repúblika, Dr. Alfonso Lopez hala’o enkontru ho delegasaun Asian Development Bank (ADB) nian, liuhosi videu konferénsia virtuál ne’ebé realiza iha sala reuniaun PJR-Colmera delegasaun ADB nian ne’ebé koloka iha nasaun sanulu resin-neen, hanesan, US West, US East, China, India Mumbai, India Hyderabad, Amsterdam Netherlands, Germany, Australia Sydney, Australia Melbourne, Hong Kong, SAR, Singapura, Canada Toronto, Canada Vancouver, Japan Tokyo, Japan Osaka, iha enkontru virtuál ne’e PJR ko’alia kona-ba, “Promosaun Sistema Judisiál Sensívél sira kona-ba Jéneru”.
Iha enkontru virtuál ne’e, PJR hatete katak “Investigasaun ba krime violénsia bazeia ba jéneru nian, Majistradu sira Ministériu Públiku (MP) nian iha investigasaun ba krime hirak ne’e utiliza de’it koñesimentu hirak ne’ebé hanorin iha Sentru Formasaun Jurídiku, no esperiénsia ne’ebé hetan durante tinan hirak nia laran nune’e mós dilijénsia prosesuál sira, tuir regra, realiza hosi funsionáriu judisiál sira, ne’ebé mak lei permite atu delega kompeténsia hirak ne’e ba no mós hosi polísia sira PSIK no PNTL – no mós realiza diretamente hosi majistradu titulár inkéritu sira nian”.
PJR solisita tan katak “Majistradu MP nian, tanba devér ofísiu, sira hatene katak hafoin realiza tiha investigasaun ba kualker krime, espesialmente krime sira violénsia bazeia ba jéneru, iha devér estatuáriu no obrigasaun legál atu enserra inkéritu ne’e, hodi pronunsia, ida hosi desizaun rua hanesan, Akuza bainhira rekolla indísiu sufisiente katak krime ne’ebé investiga ne’e pratika duni no se mak ninia ajente nune’e mós arkiva se la iha indísiu sufisiente katak krime ne’e akontese ka se mak ninia ajente ka, bainhira legalmente”.
Iha enkontru ne’e PJR konsidera ”Projetu asisténsia téknika Asian Development Bank nian esensiál hodi mellora efisiénsia no efikásia sistema justisa Timor-Leste nian iha matéria luta kontra violénsia bazeia ba jéneru, nu’udar interese Prokuradoria-Jerál Repúblika nian no Prokuradór-Jerál Repúblika atu realiza asaun formasaun espesífiku iha área krime sira violénsia bazeia ba jéneru ne’ebé destinadu ba MP.
iha biban ne’e mós delegasaun ADB nian iha nasaun sanulu resin-neen ne’e rekomenda mai PJR atu iha futuru hametin liu tan servisu entre ADB ho PJR liuhosi asina nota memorandum entendimentu ida, no PJR mós aseita ho rekomendasaun ne’e, asina nota memorandum entendimentu ne’e hanesan atu formaliza di’akliu-tan ita-nia kooperasaun servisu nian ida ne’e, hateten PJR, (Média PJR).