Dili-Tersa, loron-23, fulan-Abril, tinan-2019, Prokuradór-Jerál Repúblika Dr. José da Costa Ximenes, entrega simbolikamente sertifikadu ba Sekretáriu na’in – 7 no eskrivaun direitu na’in-9 hafoin tuir formasaun durante loron sanulu-resin-lima hahú hosi loron-18, fulan-Marsu to’o loron-05, fulan-Abril, tinan-2019, serémonia erntrega serfikadu ne’e realiza iha Edifísiu PJR Colmera.

Iha serémonia entrega sertifikadu ne’e, Prokuradór-Jerál Repúblika, hato’o mós parabens ba formandu sira ne’ebé hetan valór di’ak, “ha’u kontente tamba sira hotu pasa, ha’u kontente liu tan tanba hosi sira hotu iha formanda ida hetan mellór, mak Sekretária KSMP nian, Sra. Paulina Correia, ba sira ne’ebé eskrivaun direitu mós feto ida mak mellór, mak sra. Ricardina da Costa Ximenes, Sekretária PDB nian”.

Iha biban ne’e Prokuradór-Jerál Repúblika louva mós formandu sira hosi Prokuradoria Repúblika Distritál sira, hanesan PDO, PDB no PDS, “Há’u louva sira ne’ebé mai hosi Distritu no sira esforsu an hodi termina sira-nia formasaun, balu la iha família iha Dili tanba ne’e sira hela de’it iha kampaun Caicoli no balun ba hela aguenta iha familia durante semana tolu, maski hasoru difikuldade maibé konsege pasa, ha’u louva ita boot sira-nia esforsu”, dehan PJR.

Iha okaziaun ne’e mós PJR kongratula formadór sira “ita kongratula formadór sira tanba sira dedika ona sira-nia tempu balu hodi fó matéria durante ne’e, imi nia esforsu mak rezultadu ba formandu sira, liuhosi ita-boot sira-nia esforsu hatudu ona ba formandu sira pasa hotu maski nain rua la pasa,  maibé maioria pasa, PDD ida no PDS ida mak la pasa, ha’u kontente tebes tanba maioria pasa, ida ne’e ba dala uluk iha istória MP nian” hatete PJR.

Iha biban ne’e mós koordenadór ba formasaun ne’e, José Miguel Pina Cardoso, hateten tan “eskrivaun Direitu no Sekretáriu sai nu’udar profisionál ne’ebé  ligadu intimamente ho majistradu sira, hodi nune’e justisa sei realiza ho kualidade, iha tempu loloos no ho forma legál ba hotu-hotu, nune’e sei asume importánsia boot hosi kursu ne’ebé hafoin ramata, ne’ebé sei permite la’os de’it atu preenxe fatin tuir karreira Ofisiál Justisa nian, maibé mós aumenta nível motivasaun pesoál no dezempeñu hosi sira ne’ebé mak mai liuhosi promosaun, ba nia rekoñesimentu no valorizasaun profisionál”, dehan koordenadór ne’e.

Iha nia diskursu, Koordenadór ne’e mós agradese ba formadór sira “ha’u-nia agradesimentu ba formadór sira, ne’ebé lori sira-nia esperiénsia no koñesimentu ba formandu sira, no sira bele ho pasiénsia no matenek tranzmite orientasaun legál, teóriku no prátiku ne’ebé indispensável hodi atua koñesimentu sira ne’ebé presiza hodi fó resposta ba ezijénsia funsaun sira-nian”, Tenik nia.

Iha okaziaun ne’e mós formanda, Paulina de Araújo Correia hanesan mós Sekretaria Konsellu Superiór Ministériu Públiku (KSMP) nian, hato’o agradesimentu ba KSMP, ne’ebé fó ona oportunidade hodi promove Sekretáriu no Eskrivaun direitu liuhosi formasaun ne’ebé hala’o durante loron-15 nia laran. Formasaun ne’e fó hosi formadór internasionál no Nasionál ho matéria hirak ne’ebé adekuadu tebtebes hodi bele eleva koñesimentu ne’ebé presiza hodi fó resposta ba ezijénsia funsaun sira-nian. (Media PJR)