Díli- tersa, loron-15, fulan-Outubru, tinan-2019, Prokuradór Jerál Repúblika Dr. José da Costa Ximenes, partisipa iha enkontru Konsellu Koordenasaun Justisa ne’ebé organiza husi Ministru Justisa Manuel Cárceres.
Iha enkontru ne’e, Prokuradór Jerál Repúblika fó paraser ba ezbozu Lei Organizasaun Judisiariu no Estatutu Organiku Sentru Formasaun Juridiku no Judisiáriu nian hanesan haklaken tiha tuirmai katak ita tenki dignifika Sentru Formasaun, ita haree iha kontestu jerál, tenki tau iha nivel aas hodi dezenlvolve Sentru Formasaun ne’e atu bele sai di’ak liután iha futuru.
Iha fatin hanesan, Ministru Justisa hato’o katak, enkontru ida-ne’e hanesan ba ikus nian hodi rona opiniaun hothotu husi Membru Konsellu Koordenasaun Justisa hanesan, Prezidente Tribunál Rekursu (PTR) Deolindo dos Santos, Prokuradór Jerál Repúblika Dr. José da Costa Ximenes (PJR), Defensoria Públiku, Dr. Cãncio Xavier no Diretór Nasionál Sentru Formasaun jurídika no judisiaria Dr. Antonino Gonçalves inklui mós Adjuntu Diretór PSIK,Adino Nunes Cabral. Iha biban ne’e sira hato’o sira-nia paresér kona-ba Lei Organizasaun Judisiariu ne’ebé ho ninia artigu hamutuk 112 no Estatutu Organiku Sentru Formasaun Juridiku no Judisiáriu nian, nune’e, ikusmai Ministériu Justisa mak sei finaliza Ezbosu Lei Organizasaun Judisiariu ne’e, no tuirmai sei entrega ba Ministériu Reforma Lejizlativa no Asuntu Parlamentár (MRLAP) atu diskuti hamutuk hafoin lori ba aprezenta iha reuniaun Konsellu Ministru nian. (Media PJR)