Dili-Kinta, loron-21, fulan-Abril, tinan-2022, Prokuradór Jerál Repúblika Dr. Alfonso Lopez fó pose ba Ofisiál Justisa MP nian hamutuk ema na’in ruanulu resin ida (21), seremónia tomada-de-pose ne’e realiza iha salaun Auditóriu Ministériu Justisa nian.
PJR senti orgullu tebtebes tanba loron ohin Ministériu Públiku bele marka tan istória foun ida, hodi bele fó pose ba Ofisiál Justisa na’in ruanulu resin ida (21) hodi sai nu’udar Ofisiál Dilijénsia. Iha biban kmanek ida-ne’e, ha’u hakarak atu felizita ba emposadu sira tanba esforsu no empeñu ne’ebe imi halo no koloka durante prosesu ida ne’e finaliza ona.
PJR hatutan liután katak, Ofisiál Justisa sira dezempéña papél importante ida ligadu ho responsabilidade ne’ebe atribui ba autoridade judisiária sira hodi administra justisa, aleinde hodi fó apoiu ne’ebé fundaméntal no diretamente ba majistradu sira hodi ezekuta atu prosesuál hirak ne’ebé atu determina, no hirak ne’ebe hato’o diretamente husi sidadaun sira ne’ebé dezloka ba servisu sira Ministériu Públiku nian hodi defende sira–nia direitu no interese ne’ebé mak legalmente protejidu. Tanba ne’e sira mak transmite emprimeiru lugár, imajen husi servisu sira Ministériu Públiku nian.
PJR fiar katak liuhusi kursu formasaun jerál ne’e bele fó ona koñesimentu ne’ebe adekuadu no nesesáriu kona-ba preparasaun ida ne’ebe di’ak, atu oinsá sira ne’ebé simu ona pose ne’e bele kontribui hodi mellora nivel sira dezempeñu nian no resposta ba Sekretaria husi servisu sira Ministériu Públiku nian ne’ebé mak sira haknaar ba.
“Ofisiál Dilijénsia tenke assume ezersísiu husi funsaun hirak ne’ebe atribui ba imi. Tuir ezersísiu ne’ebé ho forma ida hodi kontribui mellora kapasidade resposta institusionál no justisa, kumpre loloos lei, orden no instrusaun husi superiór sira no ezerse funsaun sira ho sentidu responsabilidade, integridade, dedikasaun no zelu” tenik PJR iha salaun Auditóriu Ministériu Justisa (Media PJR)