Baucau, loron-22, fulan-novembru, tinan-2021, Prokuradór-Jerál Repúblika (PJR), Dr. Alfonso Lopez, fó-pose ba Dr. Ambrósio Rangel Freitas hanesan Prokuradór Distritál Baucau (PDB), hodi troka fali Dra. Remízia de Fátima ne’ebé antes ne’e lidera hela Prokuradoria Distritál Baucau
Iha diskursu PJR nian hatete katak “nu’udar PJR sente onradu hodi prezide serimónia pose ida-ne’e, tanba asume kna’ar nu’udar PJR foin ba dahuluk mak fó-pose ba Prokuradór Distritál Baucau, ne’ebé durante semana rua konforme despaxu, nomeia tiha Dr. Bartolomeo hodi dirije PDB, nia assume di’ak, mesmu tempu badak to’o ohin loron tanba momentu ne’ebá Dra. Remizia Fátima hetan ona pose husi Prezidente Repúblika iha loron-05, fulan-Novembru, tinan-2021, hanesan Adjunta Prokuradór-Jerál Repúblika (APJR), tanba ne’e mak ohin ita selebra serimónia solene ne’e ho prezensa entidade sira iha área jurisdisaun munisípiu haat, hatete PJR.
PJR akresenta tan katak, “Sidadaun sira ezije ba Prokuradór Repúblika Distritál Baucau, hein katak ezersísiu asaun penál hodi defende direitu no interese menór, inkapás no auzente sira hodi defende legalidade demokrátika no promosaun ba lei no atuasaun efisiente hodi respeita kritériu sira legalidade, objetividade no izensaun, katak desizaun sira ne’ebé pronunsia despaxu ho prazu ne’ebé konsidera razoavél.
PJR enkoraja mós katak “ha’u aproveita biban ida-ne’e atu enkoraja Prokuradór Distritál Baucau, Prokuradór Repúblika sira, ofisiál justisa no funsionáriu sira ne’ebé kolokadu iha PDB, tenke lulun kamiza liman, ne’e signifika katak tenke hakas-an labele hakmatek iha gabinete de’it maibé tenke hakas-an servisu maka’as hodi bele kontribui, nune’e bele mellora efisiénsia, efikásia no produtividade, nune’e sei ajuda atu prestijia no kredibiliza MP iha sidadaun sira-nia matan.
Iha fatin hanesan, emposadu hato’o nia agradesimentu ba Membru Konsellu Superiór Ministériu Públiku (KSMP), “hakarak agradese ba membru KSMP no majistradu MP nian ne’ebé fó-fiar mai ha’u atu asume kna’ar hanesan Prokuradór Distritál Baucau.
Emposadu ne’e akresenta tan katak, “servisu hirak-ne’e todan tanba distritu judisiál PDB abranze munisípiu haat, hanesan Baucau, Lautém, Manututu no Viqueque ho krime ne’ebé aas, ha’u konsiente katak servisu refere la fásil no la bele la’o mesak, presiza parte hotu-hotu nia kontribuisaun, tulun atu bele hala’o servisu di’ak liután, hahú hosi dirijente máximu to’o iha funsináriu sira iha MP no mós parseiru sira hotu nia kolaborasaun hanesan, juíz, Prokuradór Repúblika, defensór, ofisiál justisa, órgaun polísia kriminál no parseiru NGO sira.
Nia promete katak, ” Ha’u pesoalmente sei esforsu-an liu hosi lealdade, dedikasaun no profisionalidade tomak hodi asume kargu ida-ne’e ho responsabilidade no ha’u sei hatutan servisu tomak ne’ebé la’o tiha ona iha PDB no prontu ho lealdade atu ezekuta diretiva no orden sira hosi superiór no la’o tuir lei haruka.
Iha serimónia pose ne’e, partisipa hosi membru KSMP, Inspetora MP, Komandante Polísia Nasionál Timor-Leste (PNTL) Munisípiu Manatuto, Viqueque, Adjuntu Komandante PNTL Baucau, Prokurador Distritál Dili, Juíza Administradora Tribunál Baucau, Prokuradór Repúblika, Uma Mahon, Sekretáriu KSMP, ofisiál justisa no funsionáriu sira PDB nian, (Media PJR).