Suai-Tersa, loron-15, fulan-Fevereiru, tinan-2022, Prokuradór Jerál Repúblika, Dr.Alfonso Lopez fó posse ba Dr. Gustavo da Silva Moreira sai nu’udar Prokuradór Distritál Suai hodi subtitui fali Dr. José Elo ne’ebé mak ninia mandatu ramata ona.
Iha biban tomada-de-posse ne’e, PJR hateten katak sente onradu no agradese tanba bele fó posse ba Prokuradór Distritál Suai foun, Dr. Gustavo da Silva Moreira. Há’u haksolok bele fila fali mai iha Munisípiu Suai, uluk iha ha’u-nia primeira kareira ha’u hetan kolokasaun iha munisípiu ida-ne’e, no iha momentu ne’ebá difisil tebes, maibé agora ne’e tanba iha ona dezenvolvimentu, entaun, iha diferensia boot kompara tina tinan-2009 liubá, uluk fatin laiha ami mai hela hamutuk de’it ho Juiz sira, maibé agora ne’e iha ona mudansa ida be di’ak tebes ba prokuradór sira hodi bele hala’o sira-nia servisu ho di’ak.
PJR akresenta tan katak, “Sidadaun sira ezije ba Prokuradór Repúblika Distritál Suai, he’in katak ezersísiu asaun penál hodi defende direitu no interese menór, inkapás no auzente sira, no hodi defende legalidade demokrátika no promosaun ba lei no atuasaun efisiente hodi respeita kritériu sira legalidade, objetividade no izensaun, katak desizaun sira ne’ebé pronunsia despaxu ho prazu ne’ebé konsidera razoavél.
PJR hateten liután katak “ha’u aproveita biban ida-ne’e atu enkoraja Prokuradór Distritál Suai, Prokuradór Repúblika na’in-rua, ofisiál justisa no funsionáriu sira ne’ebé kolokadu iha PDS tenke hakas-an servisu maka’as, nune’e, bele mellora efisiénsia, efikásia no produtividade atu ikusmai sei ajuda atu prestijia no kredibiliza MP iha sidadaun sira-nia matan.
Ikusliu, PJR fó agradesimentu ba Prokuradór Repúblika Dr. José Elo ne’ebé mak fó ona ninia dedikasaun hodi hala’o servisu durante ne’e ho diak hodi servi MP.
Iha sorin seluk, empossadu Dr. Gustavo da Silva Moreira hateten katak, ha’u promete atu halo buat hotu ne’ebé koresponde ho espetativa hirak ne’ebé koloka ona iha Ministériu Públiku no preparadu atu enfrenta dezafiu hirak ne’ebé sei hasoru iha oinmai. Tinan neen resin ona mak ha’u servisu nu’udar majistradu Ministériu Públiku nian, no tinan sanulu-resin haat iha administrasaun públiku iha área Justisa nian, durante períodu ida-ne’e ha’u hetan esperénsia, koñesimentu, umlidade no liuliu kapasidade kona-ba diálogu no interasaun hodi buka solusaun ne’ebé di’ak liu ba servisu públiku sira. Hanesan majistradu karreira, sempra orientadu atu kumpri loloos konstituisaun no lei sira. (Media PJR)