Lautém, Loron-28, fulan-Dezembru, tinan-2023, Prezidente Repúblika, Dr. Jose Ramos Horta, ofisiálmente inaugura edifísiu foun Prokuradoria Repúblika Munisípiu Lautém ne’ebé lokaliza iha rua 30 de Agostu, ho objetivu atu lori justisa besik ba komunidade Lautém oan sira, tanba tempu barak sira sempre buka justisa ho distánsia ne’ebé dok.
Iha okaziaun ne’e PR fó parabéns ba setór justisa no estadu, tanba estadu komesa hadi’a ona infrastrutura justisa ne’ebé sei falta barak ba Tribunál no Prokuradór sira.
Iha diskursu PR nian, apresia tebes tanba obra ne’e ho kualidade ne’ebé di’ak no mai husi kompañia local mak konstrui ho montante orsamentu konstrusaun hamutuk $ 715.376, 94 Mill, kompostu hosi uma unidade 4 inklui mos rezidénsia ba Prokuradór no Ofisiál justisa sira.
Molok PR taka nia diskursu, husik hela lia menon ida ba Prokuradór, Ofisiál Justisa no Funsionáriu sira atu utiliza edisfísiu ne’e ho kuidadu.
Iha fatin hanesan, Prokuadór Jerál Repúblika, Dr. Afonso Lopes, hatete katak, asesu ba seitór Justisa nudár direitu fundamentál sidadaun hotu, tanba ita tenki kria kondisaun justisa ida ne’ebé adeakuadu hodi lori justisa hakbesik ba povu, tanba edifísiu ida ne’e hanesan mos kria kondisaun justisa ida diak ba populasaun Lautém atu assesu ba justisa, tanba ita-nia kondisaun ba sira ne’ebé hela iha área rurál enfrenta difikuldade iha tipu oin-oin, liu-liu estrada no transporte atu assesu hodi ba defende sira-nia direitu.
Entretantu iha relatóriu Sekretáriu Jerál-PJR, Gil da Conceiçao Savio relata katak, orsamentu ba konstrusaun edifisiu ne’e total $ 715.376, 94 Mill, no konstrui iha rai ho medida ektar 4900 m2, nune’e mos tempu ba konstrusaun durante tinan-tolu ho balun.
Nune’e mos edifísiu ne’e hetan bensaun hosi Amo Paroquia Lautém, partisipa iha serémonia inaugurasuan ne’e, Adjuntu-PJR nain tolu, Inspetora, Koordenadór Prokuradoria Primeira Instánsia, Oe-Cusse, Suai, Dili no Baucau, Prokuradór Repúblika sira, Koordenadora Reforma Seitór Justisa, Jenerál Reformadu, Lere Anan Timur, Reprejentante Tribunál Munisípiu Baucau, Kargu Xefia. Ofisiál justisa no funsionáriu sira iha PJR no sosiedade sivil balun. (Media PJR)