Dili, loron-22, fulan-Juñu, tinan-2021, Prokuradór-Jerál Repúblika (PJR), Dr. Alfonso Lopez marka reuniaun ida ho Majistradu sira hosi Gabinete Sentrál Kombate Korrupsaun no Kriminalidade Organizada (GSKKKO), iha sala reuniaun PJR Colmera Dili.
Reuniaun ne’ebé partisipa hosi Majistradu sira GSKKKO nian mak hanesan, Responsavél GSKKKO, Dr. Aderito Tilman, Dra. Lidia Soares, Dr. Ambrosio Freitas, Dr. Matias Soares, Dr. Domingos Goveia, no Dr. Rogerio Viegas, iha reuniaun ne’e ko’alia konaba liña programatiku prinsipál sira hosi mandatu PJR nian.
Iha reuniaun refere PJR hateten katak “iha liña ne’ebé jerál liu, nu’udar intensaun PJR nian mak MP hadi’a kualidade hosi ninia intervensaun no efikásia iha kombate hasoru kriminalidade enjerál, no espesialmente GSKKKO konaba krime sira korrupsaun nian haktuir Lei No. 7/2020, loron-26, fulan-Agostu”.
PJR akresenta tan, Gabinete ne’e kontinua formasaun iha área espesializadu ba majistradu sira liu hosi identifikasaun ba nesesidade reál ba formasaun ne’ebé previstu iha planu sira formasaun anuál nian ne’ebé aprovadu iha Konsellu Superiór Ministériu Públiku (KSMP), formasaun hirak ne’e realiza no sei artikula ho Sentru Formasaun Judisiáriu Jurídiku.
Nune’e mós Reorganiza GSKKKO liuhosi kriasaun seksaun espesializadu sira atu oinsá majistradu sira bele espesializa iha tipu sira kriminalidade nian ida, hanesan agora majistradu sira dirije inkéretu hosi tipu krime hirak ne’ebé kompeténsia ba GSKKKO nian.
PJR realsa tan katak “atu implementa objetivu hirak ne’e no hetan rezultadu ne’ebé di’ak nu’udar fundamentál mak kolaborasaun, dedikasaun, responsabilidade, lealdade no kontribussaun hosi Majistradu, ofisiál justisa no funsionáriu hotu nune’e mós apoiu hosi parseiru sira hanensan Parlamentu Nasionál, Polisísa Sinetifiku Investigasaun Kriminál, Komisaun Anti Korrupsaun no seluk tan”. (Media MP)