Dili-kinta, loron-17, fulan-juñu, tinan-2021 Prokuradór-Jerál Repúblika, Dr. Alfonso Lopez, hala’o enkontru ho majistradu sira Prokuradoria Distritál Dili, iha sala reuniaun PJR-Colmera, hodi rona direita difikuldade ne’ebé infrenta durante ne’e.
Iha enkontru ida ne’e PJR hateten katak, enkontru ida ne’e importante tebes tanba bele rona direita hanoin sira husi majistradu hodi haree ba planu asaun tinan-2022 nian, maske ho situasaun serka sanitária maibé majistradu sira nafatin hala’o sira nia servisu ho produtividade ne’ebé di’ak.
Nune’e mós PJR hatutan liután tan katak, formasaun kontinua maibé sei haree ba área espesializadu sira hodi eleva kapasidade majistradu no ofisiál justisa sira nian atu dezenvolve liután servisu sira MP nian.
Iha fatin hanesan Prokuradór Distritál Dili, Dr. Jacinto Soares Babo, hateten nia parte kongratula ba PJR foun ne’ebé mak iha inisiativa di’ak hodi halibur majistradu sira atu rona direita opiniaun no sujestaun sira hodi halo diskusaun kona-ba lalaok servisu husi instituisaun ida ne’e, ho nune’e bele dezenvolve di’ak liután servisu MP nian. Agradese mós ba PJR nia hanoin katak sei envolve Prokuradór Distritál sira iha diskusaun ba orsamentu jerál, tanba nesesidade sira iha Prokuradoria Distritál ne’e, Prokuradór Distritál mak hatene liu nesesidade saida mak sira presiza, liuliu ba majistradu no ofisiál justisa sira. Ida ne’e inisiativa ida ne’ebé di’ak tebes no ami hein katak ita nia hamutuk sei diskute hodi bele tau ba planu prioridade ba tinan-2022 nian.
Iha sorumutu ida ne’e mós Prokuradór Distritál Dili hatutan tan katak, prosesu pendente ba tinan ne’e sa’e tanba sitausaun serka sanitária no konfinamentu obrigatóriu nune’e halo sidadaun sira la marka prezensa máximu ba prosesu inkéritu, tanba iha Dili rasik transporte públiku la hala’o movimentu, ho situasaun ida ne’e mak hodi aumenta prosesu pendente sira. (Media MP)