Dili-Loron-28, fulan-Juñu, tinan-2021, Prokuradór-Jerál Repúblika, Dr. Alfonso Lopez, realiza reuniaun via online ho Prokuradór Distritál sira, mak hensan Prokuradór Distritál Baucau, Suai, Oecusse, no mós ho Prokuradór Distritu nain rua, hanesan Viqueque ho Bobonaro liu hosi aplikasaun Zoom.
Iha reuniaun virtuál online ne’e, hosi Prokuradoria Distritál Oecusse hato’o hosi Dr. Mateus Nessi, Prokuradoria Distritál Baucau, hato’o hosi Dra. Remiza Fatima no Prokuradória Distritál Suai, hato’o hosi Dr. Jose Elo. Iha reuniaun ne’e Prokuradór Distritál sira hato’o ba PJR konaba difikuldade no progresu ba prosesu sira durante estadu emerjénsia no serka sanitária.
PJR hatete katak “ reuniaun ne’e atu identifika inpedimentu no rona sujestaun no proposta sira atu hadi’a produtividade no servisu ne’ebé hala’o hosi Ministériu Públiku (MP) ne’ebé bele ajuda ita atu define planu estratéjiku no anuál ba jestaun sira”.
PJR apela mós ba Prokuradór Distritál sira atu garante intervensaun MP nian hodi ezekuta responsabilidade finanseiru ba sira ne’ebé jere osan no intervein tuir lei haruka iha fiskalizasaun ba despeza públika no julgamentu ba konta sira nune’e mós valoriza rekursu umanu sira MP nian hodi avalia bebeik iha promosaun no progresaun sira.
Iha biban ne’e, PJR afirma tan katak “rekursu umanu sira nu’udar ativu ne’ebé importante liu ba MP, tanba ne’e primeiru prioridade ne’ebé ha’u hola hafoin hahú ha’u nia funsaun sira mak buka atu rezolve problema pagamentu dívida ba majistradu no ofisiál justisa sira”.
PJR reafirma tan, “ha’u hakarak husu ba hotu-hotu, no ba ita boot sira ida-idak apiu, envolvimentu iha servisu, dedikasaun no responsabilidad, ita hotu hamutuk sei sai forte liu tán, hamutuk ita bele hetan rezultadu ne’ebé di’ak liu no hamutuk ita bele fó prestíjiu no kredibilidade ba MP no serve di’ak liu ita-nia konsidadaun sira.
Iha reuniaun virtuál online ne’e partisipa mós hosi Prokuradór Repúblika Distritu Bobonaro, Viqueque nune’e mós ho Sekretária sira hosi Prokuradoria Disrtritál Suai, Baukau no Oecusse. (Media MP).