DILI — iha Tersa, loron-30, fulan-Jullu, tinan-2019, Prokuradór-Jerál Repúblika Dr. José da Costa Ximenes hato’o informasaun anuál ba Deputadu sira iha Uma-Fukun Parlamentu Nasionál.   

Prokuradór-Jerál Repúblika Dr. José da Costa Ximenes ne’ebé akompaña hosi Adjuntu Prokuradór-Jerál Repúblika Dr. Alfonso lopez, Inspetora Ministériu Públiku Dra. Zélia Trindade no mós Prokuradór Distritál sira mak hanesan; Dr. Jacinto Soares Babo (PDD), Dra. Remizia de Fátima do Rosario (PDB), Dr. Mateus Nessi (PDO) no Koordenadór GSKKKO Dr. Aderito Tilman ho Dra. Lidia Soares, Koordenadór Servisu Kontensiozu Estadu Dr. Pascasio Alves, no Diretora Jerál Sra. Ana Maria Pereira Carvalho.

Iha aprezentasaun relatóriu refere, Dr. José da Costa Ximenes hato’o katak informasaun sira ne’ebé hakerek iha dokumentu eskritu ida-ne’e, ne’ebé hato’o iha momentu ida-ne’e, ha’u kumpri atu fó-sai de’it aspetu balun hosi dokumentu ida-ne’e.

Iha aprezentasaun ne’e, PJR hahú informa  uluk kona-ba Konsellu Superiór Ministériu Públiku, órgaun ba jestaun no dixiplina Majistradu Ministériu Públiku no Ofisiál Justisa sira.

Hakarak dehan katak KSMP aprova tiha mós relatóriu kona-ba inspesaun ordináriu ba sekretaria sira Prokuradoria Repúblika Distritál Dili, Baucau, Suai, no Oe-cusse, no mós ba Prokuradoria Distritu Viqueque, Bobonaro no Ermera, inklui mós halo konkluzaun no rekomendasaun sira.

PJR mós informa liután kona-ba Servisu Apoiu Tékniku no Administrativu Prokuradoria-Jerál Repúblika nian, nia subliña katak iha servisu hirak-ne’e atualmente ezerse hosi funsionáriu 77, ne’ebé kompostu hosi pesoál kuadru permanente, aumenta tan ho Ajente Administrasaun na’in- 39 ho rejime kontratu.

Estrutura interna sira ho karaktér espesializadu ida kona-ba Gabinete Sentral Kombate Korrupsaun no Kriminalidade Organizadu. Gabinete ida-ne’e atualmente kompostu hosi Prokuradór Repúblika na’in-lima, no ida hosi sira ne’e hala’o mós knaar hanesan Prokuradór Repúblika Distritál Dili nian.

Durante tinan-2018, iha Gabinete Sentral iha prosesu hamutuk 157, hosi hirak-ne’e 47 kona-ba krime ne’ebé komete tiha iha ezersísiu funsaun públika nian no 110 kona-ba krime sira ne’ebé ho tipu seluk (dezignadu nu’udar krime organizadu sira).

Iha komparasaun badak ida, haree katak númeru totál hosi prosesu ne’ebé tama iha Gabinete Sentral iha tinan-2018 hamutuk 157 aas liu oituan hosi tinan-2017 nian ne’ebé hamutuk 155. Iha tinan-2018, númeru hosi prosesu findu sira hamutuk 121 aas liu oituan hosi tinan anteriór nian ne’ebé hamutuk 109. Hafoin hala’o tiha konta, haree katak iha diminuisaun oituan kona-ba pendénsia.

Ida tan kona-ba Servisu Kontensiozu Estadu kompostu hosi Prokuradór Repúblika na’in-rua ne’ebé  atualmente hala’o knaar iha Servisu Kontensiozu Estadu, no ofisiál justisa ho númeru hanesan mak hala’o servisu sira sekretaria nian.

Durante tinan-2018, regista tiha iha Servisu Kontensiozu  Estadu prosesu administrativu hamutuk 136 (ka presu internu organizadu ho finalidade atu rekolla  no konserva  elementu nesesáriu sira hodi hola desizaun ho objetivu hodi propoin, kontesta ka atu akompaña de’it asaun judisiál sira).

Iha biban ne’e, PJR mós informa ba deputadu sira iha uma-fukun PN kona-ba prosesu sira iha Prokuradoria Repúblika Distritál ida-idak nian hanesan; Prokuradoria Repúblika Distritál Dili (PDD) durante tinan-2018 prosesu entrada hamutuk 2813, pendente    tinan-2017 hamutuk 2166, totál 4979, hosi prosesu hirak-ne’e akuza 1389 no arkiva tiha 1036, haruka ba sesaun sira seluk hamutuk 18, prosesu ne’ebé mak termina ona hamutuk 2443, nune’e pendente ba tinan-2018 hamutuk 2536.

Prokuradoria Repúblika Distritál Baucau (PDB), durante tinan-2018 nia laran rejista tiha prosesu entrada hamutuk 906, pendente hosi tinan-2017 hamutuk 306, totál hamutuk 1212 prosesu, hosi prosesu hirak-ne’e akuza tiha 470, arkiva hamutuk 398 prosesu,  remete ba seksaun sira seluk hamutuk prosesu 6 no ne’ebé mak konsege termina tiha hamutuk 874 prosesu, no prosesu pendente ba tinan-2018 hamutuk 338.

Tuir mai iha Prokuradoria Repúblika Distritál Suai (PDS), durante tinan-2018 simu prosesu hamutuk 715, pendente iha tinan-2017 hamutuk 342, totál hamutuk 1057, hosi prosesu hirak-ne’e akuza 419, no arkiva hamutuk 253, remete ba seksaun sira seluk hamutuk prosesu 6, termina hamutuk 678 prosesu, nune’e, pendente ba tinan-2018 hamutuk 379.

Kona-ba Prokuradoria Distritál Repúblika Oe-cusse (PDO) nian, durante tinan-2018 prosesu ne’ebé tama hamutuk 420 prosesu, pendente iha tinan-2017 hamutuk 35, totál 455 prosesu, hosi prosesu hirak-ne’e akuza tiha 306, no arkiva 100 prosesu, ne’ebé konsege termina 406 prosesu, nune’e, prosesu pendente ba tinan-2018 hamutuk 49, hosi númeru inkéritu hirak-ne’e tama iha Prokuradoria Distritál Oe-cusse kuaze hanesan ho tinan-2017. 

Hosi prosesu hirak-ne’ebá, kazu ofensas integridade fízika mak aas liu kompara ho  kazu sira seluk, hanesan; iha Prokuradoria Distritál Dili (PDD) kazu ofensas integridade fízika hamutuk 932, tuir kedas Prokuradoria Distritál Baucau (PDB) ho kazu ofensas integridade fízika hamutuk 310, no iha Prokuradoria Distritál Suai (PDS) kazu ofensas integridade fízika hamutuk 277, ikusliu mak Prokuradoria Distritál Oe-cusse (PDO) ho kazu ofensas integridade fízika hamutuk 175.

Tama ba iha diskusaun plenaria nian, Deputadu António Verdial husu kona-ba kazu matebian Administradór Zumalai ninia prosesu ne’e to’o ona iha ne’ebé, tanba tuir informasaun ne’ebé Deputadu ne’e rona hosi maluk PNTL hosi Munisípiu Covalima sira hateten katak sira seidauk bele halo asaun konkretu no konkretiza mehi ida-ne’e tanba seidauk iha orden hosi Ministériu Públiku, tanba ne’e husu atu Prokuradór-Jerál Repúblika tau atensaun ba situasaun ida-ne’ebé la’o hela ne’e, nune’e, povu labele hela ho dúvida. Hatete Deputadu Verdial.

Deputadu ne’e mós preokupa tebes kona-ba droga ne’ebé tama mai no sai fila fali, signifika katak iha portaun rua, portaun ida tama no portaun ida sai, no prosesu akompañamentu no asaun operasionál Prokuradór-Jerál Repúblika entre entidades pertinentes ne’ebé relevante, iha ka la’e servisu ne’e interligadu ba malu. Hanesan reprezentante povu hau kestiona asaun sira ne’e, tanba ita hotu-hotu mós tenki hatene tau iha kompreensaun iha ema umana nian dehan katak buat ida droga ne’e, buat ida ne’ebé mak bele oho fali nasaun ne’e tomak, ne’ebé husu hakraik-an atu maluk sira servisu ho onestidade, importante mak tenke iha interligadu ba malu, tanba deputadu la’os sai fali polísia ba maluk sira maibé ita hamutuk koopera ba malu no halo kolaborasaun ne’ebé kmanek, fiar katak ita sei hetan rezultadu ne’ebé signifikante no pertenente. Hatán deputadu Verdial.  

Iha fatin hanesan Deputada Olinda Guterres hato’o kona-ba rekuperasaun ativus ne’ebé ho totál 175.373 ne’e tau iha ne’ebé, tau ba kofre estadu ka tau iha kaixa Ministériu Públiku nian.

Segundu, relasiona ho apreendidu veikulu sira hanesan iha aneksu-II, iha pájina 99, depois tiha halo apreensaun ne’e  sé mak responsabiliza ba veikulu hirak-ne’e. Tuirmai deputada Olinda mós kestiona kona-ba droga ne’ebé estraga ema barak ona, droga sira ne’e mai hosi ne’ebé, sé mak lori tama mai Timor, no sé mak lori sai hosi Timor ba fali nasaun seluk.

Aleinde ne’e, deputada Maria Barreto hato’o pergunta relasiona ho memorandu ida ne’ebé Prokuradór-Jerál Repúblika ho Komisaun Funsaun Públika halo, haree ba iha asuntu alimentár no asédiu seksuál ne’ebé seidauk relata ninia implementasaun, maizumenus, iha ona desizaun ruma ba iha rezultadu hosi memorandu ida-ne’e oinsá, tanba ohin Prokuradór-Jerál Repúblika hato’o kona-ba kazu poder paternál hamutuk kazu 51 mak propoin ba tribunál, karik ida-ne’e inklui ho memorandu ida-ne’e ka la’e. Hatete deputada Maria.   

Tuirmai situasaun iha Timor-Leste ne’ebé afeta tebes ba feto no labarik, liuliu kazu violénsia doméstika, nia mós kongratula tanba kazu abuzu seksuál ba minor idade ne’ebé iha kazu ida ka rua de’it mak hetan pena prizaun tinan-4, maibé sira seluk hetan pena prizaun tinan-10 to’o tinan-23 ba leten, ho pena prizaun ida-ne’e atu eduka arguidu sira para labele akontese tan iha futuru.

Kona-ba kazu so’e bebé ne’ebé kada fulan, ita sempre rona ema so’e bebé, no públiku nia hanoin sempre fó sala ba ema ne’ebé so’e bebé liuliu ba feto ida-ne’ebé mak       isin-rua to’o ikus nia foti desizaun hodi so’e bebé ne’e, maibé ita mós tenke haree sé maka fó isin-rua feto ne’e, ida-ne’e maka presiza ita buka tuir, nune’e, ita bele hatene nia hun loloos hosi problema ne’e, iha prosesu investigasaun ne’e mak abandona hela ema ne’ebé mak fó isin-rua ne’e, entaun kazu ne’e sei akontese beibeik, ita sei labele prevene, labele kombate no susar ba ita, kompetensia la’os de’it ba Ministériu Públiku maibé responsabilidade ba sosiedade tomak.

Hatán ba pergunta sira ne’ebé Deputadu sira kestiona ona ne’e, kona-ba kazu droga nian ne’ebé tama no sai fila fali, ne’ebé uluk MP rekomenda ba Parlamentu Nasionál iha Informasaun Anuál 2017 iha pájina 101, iha Informasaun Anuál 2016 iha pájina 58, iha Informasaun Anuál 2015 iha pájina 42, relatoriu tutuirmalu ami informa hodi ita presiza fortifika ita-nia meius kontrolu iha alfandega, portu no aeroportu, no mós iha fronteira terrestre nian. Tanba saida mak droga ne’e bele tama no sai filafali. Loloos sasán hirak-ne’e ita ka’er iha Timor, ita imajina to’ok droga 200 kilograma ne’ebé mai hosi Singapura no kontentor 9 mai hosi Indonézia mai para durante fulan-6 iha portu Dili depois mak ita foin ba ka’er, uluk tinan-2012 droga kilograma 2 ka 3 hosi Singapura mai Dili, buat hirak-ne’e tanba falta kontrolu.

Atu rezolve problema ida-ne’e tenki hametin kontrolu, di’ak liu polísia imigrasaun sira ne’e fulan-6 ka fulan-3 tenki troka, sé karik ita impoin ita-nia servisu didi’ak, ha’u sente buat hirak-ne’e la akontese, no durante ne’e relatóriu alerta tiha ona, droga sira ne’e mai tama Timor-Leste hanesan tranzitu, nia distinasaun finál mak Indonézia. Nia subliña.

“Tanba saida maka sira utiliza Timor-Leste hanesan sai fatin tranzitu, entre ema ida importa mai Timor, depois esporta, ema Indonézia hirak-ne’e halo ona peskiza durante tinan-8 katak sira muda tiha Sumatra Utara ho Batam, mai fali Dili mak ba Singapura, tanba Timor-Leste nia sistema kontrollu fraku, konserteza droga hirak-ne’e sei la hamriik mesak-mesak, barak liu ho korrupsaun hosi autoridade sira, barak liu kait malu ho trafíku pessoa, droga nia finalidade mak brankeamentu kapitais, tanba ne’e Timor-Leste tenki konsolida ninia-an”.

“To’o ohin loron, iha Prokuradór-Jerál Repúblika na’in tolu, inklui ha’u mak iha Palasiu Prezidente fó ha’u-nia intervensaun hodi tau atensaun maka’as ba droga, droga kontentor 9 ne’e foi feitu hosi Ministériu Públiku ho orgaun Polisia Kriminál, sé la iha ema hosi Ministériu Públiku ita sei la konsege kaer, mesmu balun ultrapasa tiha, iha Indonézia agora ne’e autoridade Indonézia sira halo hela prosesu investigasaun, ita akompaña haree no halo hamutuk ba oin, maibé ba oin sai preokupasaun ba ita hotu nian, tanba país barak monu tanba droga”. hateten PJR.

“Tuirmai kona-ba kazu Zumalai nian ne’e katak hafoin akontesimentu, na’in ida iha ona prizaun preventiva, sira seluk iha prosesu investigasaun ne’ebé la’o nafatin, ita hakarak bainhira ba to’o tribunál ne’e metin ona”.

“Iha fatin hanesan PJR hatán kona-ba sé mak responsabiliza ba kaixa rekuperasaun ativus ne’e, kaixa ne’e MP nian ka Estadu nian, katak iha loron-8, fulan-Jullu, MP selebra protokolu ida ho banku BNU estabelese konta lima, konta ida-ne’e hanesan konta tranzitu, no konta ida-ne’e hanesan kofre ida de’it, tanba mina ilegál hirak ne’ebé tama hosi Oe-cusse, Maliana no Suai, ne’ebé mak tribunál la deside lalais, tempu udan, udan been tama, entaun ami deside fa’an (venda antisipada) no tau ba konta ne’ebé mak MP kria ho BNU, konta ne’e ami halo tiha ona iha tinan-2015 ka 2016. Antes atu fa’an, arguidu rasik asina termu/akordu ida iha ne’ebá, depois ofisiál justisa mós asina, Ita fa’an hotu tiha, Sé aban bainrua arguidu ne’e absolve, iha ne’ebá arguidu nia naran iha, númeru konta bankária iha, no arguidu nia osan ne’e ita transfere ba arguidu nia konta, nein menus sentavus ida, karik tribunál deside favór ba Estadu, konta ida-ne’e iha BNU, no dentru de konta ida-ne’e, iha kedas Konta Jerál Estadu, hein de’it transfere ba konta Jerál Estadu ninian, no ida-ne’e laiha relasaun ho regra finanseira tanba ida-ne’e la’os orsamentu Jerál Estadu, ida-ne’e orsamentu Objetu Krime nian hosi (venda antisipada), sé karik ita tau iha kofre, osan bele sai dodok tiha, sé mak atu responsabiliza, tanba ne’e mak MP buka dalan hanesan kria konta, sé aban bainrua Lei kona-ba rekuperasaun ativus ne’e aprova ona, ne’e sai di’ak liután”. Hatán PJR 

“Ida fatin hanesan, PJR mós hatán kona-ba memorandu ne’ebé MP halo ho KFP iha faze implementasaun ne’ebé la’o hela, no troka informasaun ba-malu, prosesu administrativu ba kuradór menór no família ne’e barak tebtebes, ate kazu violénsia seksuál ne’ebé mak involve menór sira ho Diretór sira, ate kazu korrupsaun sira, ami sempre enkamiña ba KFP”.

“Kestaun kona-ba so’e bebé, bainhira sé ema ida mak hetan bebé, primeiru nia tenke informa ba polísia, hafoin tiha ne’e polísia sira komunika ba Prokuradoria Distritál sira no departamentu kuradoria menór no família. Tuir Lei, Konstituisaun no Estatutu Ministériu Públiku nian, Ministériu Públiku mak reprezenta menór sira, mesmu ita laran di’ak hakarak lori mós maibé labele, tanba iha forma rua de’it para atu hetan oan ne’e mak adopsaun ho kaben para hetan-oan, tanba ne’e ita sei prosesu nia inan ne’ebé mak so’e, no ita sei haree tan sé mak kontribui fó oan ne’e, no iha parte ida mós ita tenke haree hotu kona-ba feto, bainhira isi-rua, nia mós iha presaun ba psikolojia lubun boot ida iha nia, no ita mós labele fó sala de’it ba feto ne’e, oinsá nia responde perante nia inan-aman, tanba ne’e ita akumula hodi halo investigasaun profunda”. hatán PJR              

Iha sesaun ikus nian, Prokuradór-Jerál Repúblika hato’o agradesimentu ba deputadu sira tanba iha pasiensia hodi rona ami-nia informasaun, no ami hakarak konvida ekipa komisaun A ba vizita ami nia instalasaun no balun iha Oe-cusse, instituisaun ida-ne’e partensia ba ita-boot sira nian, purtantu ami kumpri de’it buat saida mak iha, loron seluk deputadu sira nia oan no familia sira mak sei tuur iha ne’ebá hodi kontinua obra sira ne’e. (Media/PJR)