Díli-loron-22, fulan-Setembru, tinan-2020, Prokuradór-Jerál Repúblika, Dr. José da Costa Ximenes hato’o Relatóriu Mensál ba Prezidente Repúblika (PR) iha Palásiu Prezidente, Bairu Pite.
Iha enkontru ne’e, PJR informa kona-ba atividade MP nian, ne’ebé hahú normaliza hikasfali ona hafoin tiha ferias judisiál ne’ebé remata iha loron-15, fulan-Setembru. Aleinde ne’e, informa mós kona-ba ezekusaun desizaun Tribunál nian iha loron-20, fulan-Fevereiru, tinan-2020 kona-ba destruisaun matéria báziku droga nian. Agora ne’e, MP prepara hela atu halo destruisaun ba objetu droga puru ho ninia todan 3.253 kg, no informasaun formál ne’ebé hato’o husi Polísia Judisiáriu no PSIK ne’ebé konfirma tiha katak objetu ne’ebé preende iha loron-14, fulan-Janeiru, tinan 2020, nu’udar droga puru.
Iha biban ne’e, PJR mós hato’o katak arguidu ho naran Jeri ne’ebé mak transporta Timoroan na’in-rua ba Indonézia iha loron-17, fulan-Setembru, tinan-2020, Tribunál Distritál Díli kondena ona ho pena prizaun tinan sanulu, bainhira kumpri ona pena tinan sanulu ne’e, entaun, sei haruka arguidu fila ba ninia rai Filipina. Nune’e mós Gabinete Sentral Kombate Korupsaun no Kriminalidade Organizada konsege finaliza ona akuzasaun kontra eis-padre ida ho inisiál RD ho krimi abuzu seksuál kontra menór haktuir ho artigu 177 ho artigu 182, no MP husu ba arguidu hodi fó indemnizasaun sivil hamutuk dolar amerikanu rihun haatnulu resin ualu (48).
PJR mós hato’o katak, PSIK ho MP konsege preende osan falsu iha Banku Sentrál, ne’ebé involve membru ida husi F-FDTL husi komponente Navál nian, agora ne’e prosesu investigasaun la’o hela. Kazu illegál hamutuk 145, no prosesu sira ne’e agora la’o hela. Prosesu hothotu ne’ebé haruka ba iha MP, nune’e, sei haree ninia tipu krime ho elementu sira krimi nian, kazu balun mak hanesan krimi partisipasaun ekonómika no negósiu, entaun, Gabinete GSKKKO mak iha kompeténsia hodi halo investigasaun ba buat ne’e. (Media MP).