Dili-Kuarta, loron-18, fulan-Agustu, tinan-2020, Prokuradór Jerál Repúblika Dr. José da Costa Ximenes, hato’o relatóriu mensál ba PR Dr. Fransisco Guterres (Lú-Olo) iha Palásiu Prezidente Aitarak Laran.
Iha enkontru ne’e, PJR hato’o kona-ba férias Judisiál ne’ebé mak hahú ona iha loron-01, fulan-Agustu liubá no sei ramata iha loron-15, fulan- Setembru. Maski iha férias Judisiál, maibé servisu turnu nian sei kontinua la’o ho normál.
Iha biban ne’e, PJR mós informa ba PR kona-ba krime ne’ebé akontese iha Vemasi, Munisípiu Baucau, liuliu ne’ebé ligadu ho kazu omisídiu ho forma atentadu no arugidu sira ne’e iha ona prizaun preventiva, no ida seluk halo aprezentasaun periodika. Aleinde ne’e, MP liuhusi Prokuradoria Distritál Baucau hamutuk ho PNTL no PNCIC organiza malu hodi buka-tuir arguidu ne’ebé mak sunu uma sanulu resin-rua (12) no estraga komunidade sira-nia sasán inklui veíkulu no hamosu vítima hamutuk sanulu resin- sia (19) iha Nunira, Postu-Administrativu Laga. Iha Munisipiu Manufahi akontese mós krime omisídiu ho forma atentadu hamutuk ho rama ambon, no Tribunál Suai foti ona desizaun, nune’e, ikusmai arguidu sira hetan prizaun preventiva.
PJR hatutan liutan katak, tempu besik MP sei halo mós destruisaun ba matéria-prima droga nian ho kuantidade atus ida neen-nulu (160) tonelada, ne’ebé iha kontentór sia (9) nia laran, apreensaun ba matéria-prima droga ne’e halo iha tinan kotuk liubá. Durante ne’e, Ministériu Públiku (MP) kolabora ho entidade releventas hotu-hotu hanesan; Sekretáriu Estadu Meiu-Ambiente, Ministériu Saúde, Servisu Aútonomo Medikamentus no Ekipamentus Saúde (SAMES), Polísia Sientífika no Investigasaun Kriminál (PCIC), Polisia Nasionál Servisu Investigasaun Kriminál (PNSIK) no mós husi parte Alfandega nian, ho objetivu hodi rona sira-nia hanoin kona-ba métodu oinsá mak bele halo destruisaun ida bé di’ak. No ikusmai hetan tiha konkluzaun ida mak atu halo destruisaun liuhosi sunu matéria-prima droga sira ne’e ho la hamosu impaktu ruma ba saúde públiku.
Iha sorin seluk, PJR mós hato’o katak Prokuradoria Distritál Dili halo ona kooperasaun ne’ebé di’ak ho PNTL Munisipiu Dili hodi halo apreensaun ba motorizada atus ida lima nulu (150), ne’ebé barak mak la iha dokumentus, no mós durante ne’e motorizada ninian na’in la ba halo reklamasaun ba MP, nune’e, promove tiha ona ba Tribunál Dili, no ikusmai deside hodi afavór ba estadu. Servisu Tékniku Prokuradoria Jerál nian liuhusi ninia Departamentu Lojístika halo hela kooperasaun ho Diresaun Patrimóniu Estadu hodi haree ba prosesu leilaun.
Ikusliu, PJR hato’o agradesimentu ba Prezidente Repúblika ne’ebé fó ona ninia prontidaun hodi hakerek prefásiu ba livru ho títulu “Ministériu Públiku no Protesaun ba Família no Menór sira tuir Kontestu Timorense”, livru ne’e rasik sei lansa iha fulan-Outubru, tinan-2020, iha loron komemorasaun aniversáriu MP nian ba dala rua-nulu (20). (Media MP