Dili-Kinta, loron-24, fulan-Fevereiru, tinan-2022, Prokurador Jerál Repúblika Dr. Alfonso Lopez, Adjunta-PJR Dra. Remizia de Fátima da Silva hamutuk ho Prokuradór Nasionál sira hala’o vizita kortezia ba edifisiu PCIC hodi haree diretamente kondisaun no servisu PCIC nian.
Iha biban vizita ida-ne’e, PJR agradese ba PCIC ne’ebé mak disponivel ona hodi simu vizita ida-ne’e, no ne’e nu’udar primeira vizita husi PJR no adjunta-PJR ba iha edifisiu ne’e. PJR hateten katak loron-ohin hanesan oportunidade ida ne’ebé pertinente tebes hodi hamutuk iha-ne’e fahe ideia ba malu kona-ba oinsá mak bele servisu hamutuk iha área investigasaun, nune’e, iha oinmai kooperasaun entre MP ho PCIC bele la’o di’ak liután no bele fó apoiu ba Ministériu Públiku.
Bainhira simu ninia bainaka sira ne’e, ba dahuluk nian Diretór PCIC Dr. Vijente Fernandes e Brito hato’o Bem-Vindu ba PJR ho ninia ekipa sira, Diretór PCIC hateten katak vizita ida-ne’e pertinente no krusiál tebes, tanba liuhusi ida-ne’e, PJR ho nia ekipa bele haree diretamente kapasidade reál no atuál ne’ebé PCIC iha, liuliu iha Unidade Apoiu Investigasaun Kriminál, ne’ebè kompostu husi Departamentu haat (4).
Diretór PCIC ne’e sublina tan katak planu estratèjiku PCIC tinan-2022 to’o 2030 nian mak kriasaun unidade apoiu ne’ebé importante hodi fó suporta ba planu estratèjiku ne’e, no unidade hirak ne’e mak hanesan; Departamentu Apoiu kona -ba Finansas no Administrasaun, Gabineti Inspeksaun no Dixiplinar ne’ebé promove prosesu dixiplinár no auditoriál, Departamentu Asesoriál no Relasaun Públiku ne’ebé toma-konta fó asesoria ba diresaun nasionál hodi bele fó asisténsia jurídiku ba Diretór PCIC, Adjuntu-PCIC no a departamentu sira seluk.
Durante tinan-2021, Ministériu Públiku delega ona kompeténsia ba PCIC ho prosesu hamutuk 177, nune’e mós krime ne’ebé PCIC rejista prosesu hamutuk 215 no krime ne’ebé aas liu mak krime burla simples no agravadu ho prosesu hamutuk 124.
Aleinde ne’e, Diretór PCIC esplika tan katak krime balun la’os kompeténsia PCIC ninian, maibé, komunidade barak mak mai hato’o keixa iha ne’e, ami simu no rejista hafoin tiha ne’e haruka fali ba Ministériu Públiku ne’ebé hanesan na’in loloos ba prosesu krime sira ne’e.
Diretór PCIC no Adjuntu PCIC hamutuk ho Xefe Departamentu Investigasaun no Xefe Departamentu Laboratóriu mak simu diretamente vizita husi Prokuradór Jerál Repúblika, Adjunta-PJR, Koordenadór GSCCCO no Koordenadór Kontenjiozu Estadu. (Media MP)