Dili- Sesta, loron-05, fulan-Janeiru, tinan-2021, Prokuradoria Jerál Repúblika ho Provedoria Direitu Umanu no Justisa asina Memorandu Entendimentu hodi hametin kooperasaun entre instituisaun rua ne’e, liuliu hodi haree kona-ba hahalok krime sira ne’ebé mak durante ne’e PDHJ rejista ona.
Iha serimónia asina MoU ne’e, Prokuradór Jerál Repúblika Dr. José da Costa Ximenes hateten katak durante ne’e MP hala’o ona kooperasaun ho PDHJ, no ohin atu formaliza de’it MoU ne’e hodi hametin liután kooperasaun entre MP ho PDHJ.
PJR hatutan liután katak iha objetivu importante tolu husi asina MoU ne’e, primeiru mak atu promove defeza ba legalidade demokrátika, segundu atu promove defeza ba sidadaun sira-nia direitu umanu no ikusliu mak promove asaun penál.
Iha biban ne’e, PJR mós husu ba PDHJ tenke hala’o kooperasaun ida ne’ebé di’ak, karik iha oin mai iha keixa ruma mak tama, entaun, bele haruka kedas ba iha MP, nune’e, bele hala’o kedas asaun penál, no bainhira prosesu ne’e la la’o vítima sira bele ba direta MP no ba PDHJ atubele hatene prosesu nia andamentu ne’e la’o to’o iha ne’ebé.
Iha sorin seluk, reprezentante husi Provedoria Direitu Umanu no Justisa, Dra. Jeuína Maria Ferreira Gomes hateten katak objetivu hosi asina MoU entre PJR ho PDHJ ne’e hodi intensifika no dezenvolve di’ak liután kooperasaun entre instituisaun rua ne’e, liuliu hodi melloria no fasilita sidadaun sira-nia solisitasaun ne’ebé mak hato’o ba iha instituisaun refere ne’e, no durasaun MoU ne’e rasik durante tinan-4.
Nia akresenta liután katak haktuir Estatutu PDHJ nian, liuliu iha Artigu 33 dehan katak bainhira PDHJ simu keixa ka informasaun ruma ne’ebé iha indísiu pratika krime, PDHJ haruka ba iha MP hodi hala’o asaun penál, no PDHJ tenke informa filafali ba kesar-na’in sira kona-ba notisia-do-krime ne’ebé mak haruka ona ba iha MP.
Iha tinan-2020 PDHJ haruka ona prosesu hamutuk tolunulu resin lima (35) ba Ministériu Públiku, no PDHJ konsege rejista ona prosesu hanesan; direitu umanu ba boa-governasaun ne’ebé ligadu ho má-administrasaun, abuzu poder no agresaun fizika.
Sira ne’ebé partisipa iha serimónia asina MoU ne’e mak; Prokuradór Jerál Repúblika Dr. José da Costa Ximenes, Adjuntu-PJR, Inspetora-MP, Xefe Gabinete-PJR, Diretora Jerál-PJR, no reprezentante hosi Provedoria Direitu Umanu no Justisa Dra. Jeuína Maria Ferreira Gomes, Adjunta-PDHJ, Diretór PDHJ hamutuk ho ekipa sira. (Media PJR)