Díli- Segunda, loron-28, fulan-Outobru, tinan-2019, Prokuradór Jerál Repúblika Dr. José da Costa Ximenes ho simbolikamente tau-fatuk dahuluk nian ba konstrusaun edifisiu Gabineti GSKKKKO iha Kolmera.
Iha ninia intervensaun PJR hateten, relativamente ho alokasaun orsamentu tinan 2019 ba projetu Ministériu Públiku nian Governu atribui de’it 20% ba alokasaun orsamentu ne’e, hosi totál orsamentu bo’ot ne’ebe aprovadu, no haree ba oráriu pedidu ho pensamentu hosi kompañia ne’ebe sei hato’o iha progresaun 50% no 100%, Ministériu Públiku husu bele muda, razaun tanba hein to’o atinji ona 50%, atualmente MP iha deit 20% tanba ne’e husu atu bele aselera projetu ne’e no bele hatama pedidu 20% ba servisu ida-ne’e.
Relasionadu ho projetu ida-ne’e, PJR haktuir katak, kompañia iha kapasidade di’ak no la fó prejuízu bo’ot ba estadu, karik projetu ne’e bele finaliza iha fulan-Outobru tinan-2020, entaun ita bele inagura, ha’u fó de’it dezafiu tinan oin MP konstrui 20 anos iha loron-6, fulan-Juñu, se karik projetu ne’e la’o ho didi’ak no bele lais ita hakarak halo atividade festa bo’ot ba etapa ida-ne’e karik bele konsege, se labele konsege prontu ita bele la’o nafatin.
Iha fatin hanesan, Diretór kompañia Bobolait Carlito M.S. Pereira, hateten katak, MP fó ona fiar mai ami atu ezekuta projetu ida-ne’e durante tinan ida, maibé iha posibilidade ami bele finaliza la to’o tinan ida. Husu ba tékniku MP no téniku sira kompañia Bobolait nian atu mantein nafatin kolaborasaun, nune’e, servisu ne’e bele la’o ho di’ak.
Serimónia tau-fatuk dahuluk nian ba konstrusaun edifísiu Gabinete GSKKKKO nian ne’e hetan partisipasaun hosi Prokuradór Jerál Repúblika, Dr José da Costa Ximenes, Adjuntu PJR, Dr. Alfonso Lopes, Prokuradór Dr. Aderito Tilman, Dr. Pascasio Alves no Dr. Luis Hernani Rangel da Cruz, inklui mos kargu servisu administrasaun jerál MP nian. (Media PJR)