DILI – Prokuradoria Jerál Repúblika (PJR) ho Unidade Informasaun Finanseira (UIF), kuarta-feira (21/12/2016) assina nota Momorandu Entendimentu ida hodi hametin liu tan koperasaun entre instituisaun rua ne’e.
“Ministériu Públiku, liu hosi Prokuradoria Jerál Repúblika, ohin marka momentu importante ida tamba ba dala uluk PJR hamutuk ho UIF asina Memorandu Entendimentu ida atu hametin liu tan servisu, liuliu iha prosesu investigasaun finanseira, tanba UIF assume papél importante tebes iha ita nia rain bainhira ita koalia koalia ba investigasaun kriminál iha ámbitu investigasaun finanseira”, informa Prokuradór-Jerál Repúblika (PJR), José da Costa Ximenes.
Aleinde ida ne’e, tuir PJR katak, Lei n.°17/2011 no alterasaun dahuluk iha 5/2013, kona-ba Prevensaun no Kombate Brankeamentu Kapitál iha Timor-Leste mak hanesan baze ba koperasaun ne’e.
Iha fatin hanesan, Diretora Ezekutiva UIF nian, Maria Sarmento, esplika katak UIF harii iha 2011 iha Banku Sentrál nia laran, haktuir Lei n.°17/2011, maibé knaar UIF ida ne’e jestaun operasional independente no hala’o servisu ne’e independente hodi analiza ba tranzasaun finanseira suspeita sira.
“Bainhira atividade tranzaksaun ida iha involvimentu no ligasaun krimi brankeamentu kapitál ka kulaker krime sira ne’ebé fó orijin barak no sai razaun forte katak ida ne’e iha ligasaun, UIF komunika mai iha MP nune’e mós UIF la’os hein de’it relatóriu mak komunika ba lae, maibé obrigasaun UIF atu kopera ho Autoridade Judisiária sira hodi responde ba pedidu sira mai hosi MP ka orgaun polisía kriminál sira”, dehan Diretora UIF ne’e. (Media PJR)