Liquiça, Iha loron-18, fulan-Fevereiru, Tinan-2019, Señor Prokuradór-Jerál Repúblika halo vizita ofisial ida ba komandu Polisia Nasionál Timor-Leste (PNTL) Munisípiu Liquiça nian. Iha okaziaun ne’e señor Prokuradór-Jerál Repúblika halo enkontru ho komandante Distritu ho nia adjuntu inklui mós komandante eskuandra sira husi àrea Liquiça nian I mós membru sira seluk husi servisu investigasaun no servisu sira seluk hamutuk nain rua-nulu (20) liu.
Durante enkontru, Señor Prokuradór-Jerál Repúblika hato’o katak, PNTL
mak seguransa ba komunidade nune’e tenke kontinua hatudu profisionalizmu atu povu
bele laran-metin ba Polisia Nasionál Timor-Leste (PNTL). Nudar kuadru PNTL ita-boot sira tenke hatudu
ezemplu iha atuasaun hotu-hotu liu-liu atuasaun ba grupu arte marsiál sira.
Señor Prokuradór-Jerál mós kontinua enkoraza no husu membru sira
Polisia Nasionál Timor-Leste (PNTL), liu-liu PNTL Distritu Liquiça nian atu
kontinua estuda makás atu nune’e bele asegura ka garante kualidade husi nia
atuasaun sira. Liu-liu oinsa mak bele asegura kualidade investigasaun iha
membru sira ne’ebé servisu iha investigasaun kriminál.
“Prokuradór-Jerál Repúbllika mós
husu atu PNTL Liquiça kontinua hamutuk ho Ministériu Públiku hodi firme kombate krime iha munisipiu ida
ne’e. No ba ida ne’e konta ho ha’u nia apoiu pesoal no institusionál” salienta
Prokuradór-Jerál Repúblika.
Iha fatin hanesan, Komandante Polisia Distritu Liquiça nian hato’o mós
agradesementu ba señor Prokuradór-Jerál Repúblika tanba fó ona tempu hodi hakat
to’o iha Munisípiu Liquiça atu fo nafatin korajen ba polisia sira hodi hala’o
kna’ar lorloron nian iha fatin ne’ebá.