Dili- Segunda, loron-16, fulan-Novembru, tinan-2020, Prokuradór Jerál Repúblika (PJR) Dr. José da Costa Ximenes, informa atividade Ministériu Públiku (MP) nian ba Prezidente Repúblika (PR), Dr. Francisco Guteres Lú-Olo, iha Palasiu Prezidente Bairu Pite.
Iha reuniaun mensál ne’e PJR informa ba PR kona-ba atividade sira durante fulan-Outubru nian to’o ohin loron, dehan PJR “ tuir balansu jerál ba akitividade MP nian hahú husi loron-1, fulan-janeiru, to’o loron-31, fulan-outubru, prosesu entrada iha MP hale’uk ihun lima atus neen (5.600) iha nivél nasionál, ida ne’e ha’u bele dehan ultrapasa uitoan ita-nia kapasidade resposta, maibé ita konsege fó resposta ba prosesu atus lima hitunulu resin- hitu (577), Pendente ho prosesu atus tolu ruanulu, (320) no arkiva atus rua limanulu resin- hitu (257).
Iha okaziaun ne’e mós PJR informa kona-ba kazu Raikotu nian, kazu ne’e desde inísiu Prokuradoria Distritál Dili servisu hamutuk ona ho Polísia Nasionál Investigasaun Kriminál hodi detein arguidu, agora iha ona prizaun preventiva.
PJR hatutan mós katak PR enkoraja MP atu kontinua halo esforsu hodi luta kontra krime organizadu, persiza alerta tanba bele atinji no akontese iha sosiadade Timor Leste. Nune’e mós MP agradese tebes ba Nai PR ninia suporta tomak. No atu luta kontra krime organizadu presiza parte hotu nia tulun hanesan media halo divulgasaun informasaun makas. (Media MP)