DILI-Segunda,
loron-24, fulan-Juñu, tinan-2019, Prokuradór-Jerál Repúblika (PJR), Dr. José da
Costa Ximenes, hato’o relatoriu mensál ba Prezidente Repúblika (PR), Francisco
Guterres Lú-Olo, iha Palasiu Prezidente Bairropite.
“Informa ba Sua Exelénsia Prezidente Repúblika, ita halo
karta ba Prezidente Parlamentu Nasionál para bele hato’o informasaun anuál ba
Parlamentu Nasionál tanba Konstituisaun Repúblika dehan katak Prokuradór-Jerál
Repúblika responde perante Xefe-Estadu no anualmente fó informasaun anuál ba Parlamentu
Nasionál, tanba ne’e Prokuradoria Jerál Repúblika kumpri dever konstitusionál
ida-ne’e”, hatete PJR hafoin ramata reuniaun.
Iha biban ne’e, PJR mós informa ba PR kona-ba sidadaun
Timoroan na’in-rua ne’ebé agora iha hela sela Polísia Indonezia-Belu, “inísiu
fulan-Juñu, sidadaun Timoroan na’in-rua ultrapasa ita-nia fronteira, nune’e to’o
iha fronteira Indonezia nian autoridade Indonezia ka’er sira hamutuk ho objetu
droga ekstasi ho ninia todan kilograma 1,800
ka ho ninia musan 4.472, haruka ona ha’u-nia Prokuradór ida ho autoridade polísia
ida ba hasoru malu ho autoridade Polísial Indonezia no sira informa katak autoridade
Indonezia halo ona orden denunsiasaun-de-inkéritu.
PJR hateten liután katak “autoridade Polísiál Indonezia
ka’er sidadaun timoroan na’in-rua ne’e, aleinde ne’e ita mós ka’er sidadaun
Filipina ida ho inisiál JG, timoroan na’in-rua ne’e ho inisiál JSP ho AS, no agora
ne’e ita tenta halo kontaktu ho autoridade sentrál Indonezia nian atu haree kona-ba
kestaun sidadaun Timoroan na’in-rua ne’e”.
Iha enkontru mensál ne’e, PJR informa mós ba PR kona-ba
kazu inan ne’ebé so’e bebé, “informa ba Sua Exelénsia Sr. Prezidente kona-ba
polemika bebé ida ne’ebé nia inan so’e hela, ema balun dehan nusa mak entrega
fali bebé ba família, desizaun ne’ebé Ministériu Públiku ho Tribunál foti
desizaun ne’ebé lo’os para intrega ba família, ba señor ne’ebé hetan divia primeiru
nia informa ba Polísia hodi ba Ministériu Públiku, tanba Ministériu Públiku mak
reprezenta minór tuir konstituisaun, Tribunál la deside entrega labarik ba nia
inan maibé entrega ba família, labarik nia inan hein prosesu tuir mai ba poder
patrilineár”.
Iha biban ne’e, PJR informa mós rezultadu inspesaun
ordinária ba Prokuradór na’in-4, ”prosesu inspesaun ordinária ba Prokuradór Repúblika
na’in-4 husi 2a klase ba 1a klase nian kuaze finaliza
ona, iha fulan-Jullu bele deskute ona kona-ba ninia rezultadu, depois konsellu
sei deside, nune’e mós formasaun ba ofisiál justisa na’in-29 husi Ofisiál Dilijénsia nian ne’ebé mak kompleta
ona tinan tolu atu bele tuir formasaun ba nivél Adjuntu Eskrivaun nian, depois inísiu fuan-Jullu sei halo teste ba
sira”, (Media PJR).